ព័ត៌មានជាតិ

ភ្លៀងលាយខ្យល់ខ្លាំង រលំដើមជ្រៃក្រឹមក្នុងវត្តច្បារអំពៅសង្កត់ម៉ូតូគ្រូពេទ្យចាក់វ៉ាក់សាំង២គ្រឿង

បានផុស

៤ years មុន

នៅ

ថ្ងៃអាទិត្យ ៦ មិថុនា ២០២១

ដោយ

Mey Soklim

ម៉ូតូ២គ្រឿងដែលជាកម្មសិទ្ធិរបស់គ្រូពេទ្យមកចាក់វ៉ាក់ជូនប្រជាពលរដ្ឋបានរងការខូចខាតដោយសារតែដើមឈើដ៏ធំបានរលើងគល់ដួលពីលើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីរាយការណ៍ពីលោក ជូ ចាន់នី ជំនួយការសង្កាត់ច្បារអំពៅទី២បានឲ្យដឹងថាកាលពីវេលាម៉ោង១៤ រសៀលថ្ងៃទី៦ខែមិថុនានេះមេឃធ្លាក់ភ្លៀងលាយឡំនិងខ្យល់កន្ត្រាក់បានធ្វើឲ្យដើមឈើ ប្រភេទយក្ស(ដើមជ្រៃក្រឹម)បានដួលរលំលើម៉ូតូរបស់គ្រូពេទ្យដែលមកចាក់វ៉ាក់សាំងជូនដល់ប្រជាពលរដ្ឋស្ថិតក្នុងវត្តពោធិ៍ព្រះបាទហៅវត្តច្បារអំពៅមានទីតាំងក្នុងសង្កាត់ច្បារអំពៅទី២ខណ្ឌ ច្បារអំពៅរាជធានីភ្នំពេញដោយពុំបានប៉ះពាល់ដល់មនុស្សដោយសារតែមនុស្សម្នារត់ទៅជ្រកក្នុងទីចាត់ការសាលាបឋមសិក្សាវត្តច្បារអំពៅអស់។

លោកជូ ចាន់នី បានបញ្ជាក់ថា រាល់ថ្ងៃសម្បូរមនុស្សក្មេងចាស់ ពិសេសអ្នករត់ម៉ូតូឌុបបានមកឈរជ្រកក្រោមម្លប់ដើមជ្រៃក្រឹមនេះហើយសំណាងណាស់ដែលពេលមានខ្យល់ខ្លាំងប្រជាពលរដ្ឋលោកនាំគ្នារត់ជ្រកនៅក្នុងសាលាអស់។

បើតាមគណកម្មការវត្តបាននិយាយថាដើមឈើនេះមានអាយុកាលជាង១០០ឆ្នាំមកហើយតាំងពីវត្តពោធិ៍ព្រះបាទនេះបានកកើតឡើង។ហើយបែជារលំនៅពេលធ្លាក់ភ្លៀងនារសៀលថ្ងៃទី៦ខែមិថុនានេះតែម្តង៕

អត្ថបទ៖នរា