បើកការបិទខ្ទប់មិនទាន់បានប៉ុន្មានផង គ្រូពេទ្យ ឥណ្ឌា ព្រមានផ្ទុះកូវីដខ្លាំងជាងមុន ក្រោយអ្នកដំណើរប្រមូលផ្ដុំគ្នាកកកុញគ្មានរក្សាគម្លាត

គ្រូពេទ្យជំនាញបានព្រមាននៅថ្ងៃអង្គារនេះថា ប្រទេសឥណ្ឌាអាចនឹងមានករណីឆ្លងជំងឺកូវីដ ១៩ ឡើងវិញ និងខ្លាំងជាងមុន បន្ទាប់ពីអ្នកធ្វើដំណើររាប់ពាន់នាក់នៅរដ្ឋធានីដេលី បានប្រមូលផ្តុំគ្នាដោយគ្មានរក្សាគម្លាតសង្គម នៅស្ថានីយ៍រថភ្លើងក្រោមដី និងផ្សារទំនើប ។

ទីក្រុងធំៗរបស់ឥណ្ឌា បានចាប់ផ្តើមដកការបិទខ្ទប់យ៉ាងតឹងរឹង ខណៈដែលអត្រាឆ្លងថ្មីនៅទូទាំងប្រទេស បានធ្លាក់ចុះដល់កម្រិតទាបបំផុត ក្នុងរយៈពេលជាង ២ ខែកន្លងមកនេះ ។ ក្រុមវេជ្ជបណ្ឌិតនិយាយថា ការបើកដំណើរការឡើងវិញនៅជិតទីក្រុងដេលី គឺមានការព្រួយបារម្ភខ្លាំងណាស់ ។

ទន្ទឹមនោះ ក្រុមអ្នកជំនាញ និងវេជ្ជបណ្ឌិតបានព្រមានថា ការបើកប្រទេសឡើងវិញ ដើម្បីឆ្ពោះទៅរកការធ្វើជំនួញដូចធម្មតា នឹងធ្វើឲ្យប៉ះពាល់ដល់កិច្ចខិតខំប្រឹងប្រែងចាក់វ៉ាក់សាំង ព្រោះថា ប្រហែល ៥ ភាគរយប៉ុណ្ណោះ នៃមនុស្សពេញវ័យចំនួន ៩៥០ លាននាក់ ត្រូវបានទទួលការចាក់វ៉ាក់សាំង ។

នៅព្រឹកថ្ងៃអង្គារនេះ បណ្តាញផ្លូវដែកនៅក្រោមដីរបស់ទីក្រុងដេលី បានចេញសេចក្តីជូនដំណឹងនៅលើ Twitter អំពីចរាចរណ៍កើនឡើង និងការតម្រង់ជួរយ៉ាងវែង របស់អ្នកដំណើរដោយមិនមានការរក្សាគម្លាតសង្គមឡើយ ។

បន្ទាប់ពីមានការបិទខ្ទប់ប្រទេសយ៉ាងតឹងរឹង រយៈពេល ៥ សប្តាហ៍នៅទីក្រុងដេលី អាជ្ញាធរបានបើកហាង និងផ្សារទំនើបឡើងវិញ ហើយបានអនុញ្ញាតឲ្យភោជនីយដ្ឋានដាក់កន្លែងអង្គុយ ៥០ ភាគរយ ។ បណ្តាញផ្លូវដែកនៅជាយក្រុង អាចដំណើរការបាន ៥០ ភាគរយ ហើយការិយាល័យបានបើកដំណើរការឡើងវិញទៅតាមផ្នែកផងដែរ ។

ការបើកដំណើរការឡើងវិញនេះ ធ្វើឡើង បន្ទាប់ពីនៅទូទាំងប្រទេសឥណ្ឌា បានរាយការណ៍ពីករណីឆ្លងថ្មីនៃជំងឺកូវីដ ១៩ ចំនួន ៦០,៤៧១ ករណី និងអ្នកស្លាប់ ២,៧២៥ នាក់ ក្នុងរយៈពេល ២៤ ម៉ោងចុងក្រោយនេះ ដែលជាចំនួនទាបបំផុតចាប់តាំងពីថ្ងៃទី ៣១ ខែមីនា ។

ចំណែកករណីឆ្លងសរុបនៅទូទាំងប្រទេសឥណ្ឌា គិតត្រឹមពេលនេះមានចំនួន ២៩.៥៧ លានករណីដែលជាចំនួនខ្ពស់បំផុតលំដាប់ទី ២ នៅលើពិភពលោក បន្ទាប់ពីសហរដ្ឋអាមេរិក ខណៈមានអ្នកស្លាប់ ៣៧៧,០៣១ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ The Straits Times

ចុចអាន ៖ ប្លែកទៀតហើយ ឥណ្ឌា ! រត់ចេញពីប្ដី ៦ ខែ ត្រឡប់មកវិញត្រូវគេចាប់ស្រាតសម្លៀកបំពាក់ឲ្យដើរតាមភូមិជាការដាក់ទណ្ឌកម្ម

ចុចអាន ៖ ដើមចម​ដែល​​ប្រជាជន​ឥណ្ឌា មាន​ជំនឿ​ងប់ងុលខ្លាំង​ លើ​ទឹក​នោម ​​និង​លាមក​គោ​