បិទខ្ទប់ផ្លូវ​ជុំវិញផ្សារ​បានលុង ​និងបុរី លីម ប៊ុណ្ណា ​រយៈពេល ១៤ ថ្ងៃ

អាជ្ញាធរក្រុងបាន បានចុះបិទខ្ទប់ទីតាំងជុំវិញផ្សារបានលុង ដែលស្ថិតនៅក្នុងភូមិជ័យជំនះ សង្កាត់ឡាបានសៀក ក្រុងបានលុង និងបុរី លីម ប៊ុណ្ណា ស្ថិតនៅភូមិអភិវឌ្ឍន៍ សង្កាត់ឡាបានសៀក ក្រុងបានលុង ជាបណ្ដោះអាសន្ន រយៈពេល ១៤ថ្ងៃ ដោយអនុវត្តចាប់ពីថ្ងៃទី២៤ ខែមិថុនា ដល់ថ្ងៃទី៧ ខែកក្កដា ឆ្នាំ២០២១។

លោក ងិន ណែល អភិបាលក្រុងបានលុងបានប្រាប់អ្នកសារព័ត៌មានថា ដោយសារការកើនឡើងច្រើន នៃការឆ្លងជំងឺ​កូវីដ-១៩ ទើបរដ្ឋបាលខេត្តបានសម្រេច បិទខ្ទប់ទីតាំងចំនួន២ ខាងលើនេះជាបណ្ដោះអាសន្នរយៈពេល១៤ថ្ងៃ ដើម្បីគ្រប់គ្រងស្ថានការណ៍ការឆ្លងរីករាលដាលជំងឺកូវីដ១៩។

លោកអភិបាលក្រុងបានបញ្ជក់ថា ការបិទខ្ទប់តំបន់ទាំង២ខាងលើនោះ ក្នុងកម្រិតតំបន់ពណ៌លឿងទុំនេះ គឺប្រជាពលរដ្ឋនៅក្នុងតំបន់នោះ ត្រូវតម្រូវឲ្យនៅក្នុងផ្ទះ លើកលែងចេញក្រៅផ្ទះដើម្បីទៅបំពេញការងារដែលមានការអនុញ្ញាត ទិញម្ហូបអាហារ ឬទៅទទួលសេវាសុខភាព និងករណីមួយចំនួនទៀតដែលមានការអនុញ្ញាតពីអាជ្ញាធរតែប៉ុណ្ណោះ។

លោកអភិបាលក្រុងក៏បានសំណូមពរឲ្យបងប្អូនប្រជាពលរដ្ឋទាំងអស់ អនុវត្តតាមវិធានការសុខាភិបាល ៣ការពារ ៣កុំ ឲ្យបានខ្ជាប់ខ្ជួន ត្រូវពាក់ម៉ាស់ លាងដៃឲ្យបានញឹកញាប់ រក្សាគម្លាត និងត្រូវចូលរួមសហការទាំងអស់គ្នា ដើម្បីអាចកាត់ផ្ដាច់ការចម្លងជំងឺនេះទាំងស្រុង៕ អត្ថបទ៖ វុទ្ធ ឦសាន