ព័ត៌មានជាតិ

ខេត្តកណ្ដាល មានអ្នកឆ្លងកូវីដ ១៩ កើនឡើងដល់ជិត៧ពាន់នាក់ និងស្លាប់ជិត៣០នាក់

បានផុស

៤ years មុន

នៅ

ថ្ងៃសៅរ៍ ២៦ មិថុនា ២០២១

ដោយ

រហូតមកដល់ពេលនេះខេត្តកណ្តាល មានអ្នកជាប់ពាក់ព័ន្ធនឹងព្រឹត្តិការណ៍សហគមន៍២០កុម្ភៈប្រមាណជិត៥ម៉ឺននាក់ ក្នុងនោះមានអ្នកឆ្លងជំងឺកូវីដ១៩ប្រមាណជិត៧ពាន់នាក់ និងស្លាប់ជិត៣០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់មន្ទីរសុខាភិបាលខេត្តកណ្តាល បានឱ្យដឹងថា ក្នុងចំណោមអ្នកពាក់ព័ន្ធជិត៥ម៉ឺននាក់នោះ អ្នកដែលកំពុងធ្វើចត្តាឡីស័កនៅតាមមណ្ឌល ចំនួន ៨៩៩នាក់និងធ្វើនៅតាមផ្ទះមានចំនួន ៥,៨៥៤នាក់។ អ្នកត្រូវបញ្ចប់ចត្តាឡីស័ក នៅមណ្ឌលមានចំនួន ៧,២៨២នាក់ និងបញ្ចប់នៅតាមផ្ទះមានចំនួន ៣៥,២៦៦នាក់។

របាយការណ៍ដដែលបានបន្តថា រីឯអ្នកឆ្លងជំងឺកូវីដ១៩ សរុបមានចំនួន ៦,៧៩០នាក់ ជាសះស្បើយសរុបមានចំនួន ៥,៤៧៤នាក់ និងករណីស្លាប់សរុបមានចំនួន ២៦នាក់។ តាមការកត់សម្គាល់អ្នកឆ្លងជំងឺកូវីដ១៩ នៅខេត្តកណ្តាល ត្រូវបានគេមើលឃើញថា ភាគច្រើនឆ្លងទៅលើបងប្អូនកម្មករកម្មការិនីរោងចក្រ ពិសេសនៅស្រុកអង្គស្នួល ដែលមានរោងចក្រសហគ្រាសច្រើនជាងគេ។

តាមរយៈរបាយការណ៍ខាងលើនេះ ខេត្តកណ្តាលនៅតែជាខេត្តមួយ ដែលមានអត្រាឆ្លងខ្ពស់មួយបន្ទាប់ពីរាជធានីភ្នំពេញនិងខេត្តព្រះសីហនុ។ បច្ចុប្បន្ននេះខេត្តកណ្តាល បានកំពុងបើកយុទ្ធនាការចាក់វ៉ា់ក់សាំងការពារជំងឺកូវីដ១៩ ទៅលើប្រជាពលរដ្ឋនិងកម្មករកម្មការិនីរោងចក្រចំនួន៦០ម៉ឺននាក់ ។

លោក វេជ្ជបណ្ឌិត គួយប៊ុនធឿន ប្រធានមន្ទីរសុខាភិបាលខេត្តកណ្តាល បានមានប្រសាសន៍ថា យុទ្ធនាការចាក់វ៉ាក់សាំងនេះ គឺចាក់ជូនពលរដ្ឋនៅក្រុងតាខ្មៅនិងពលរដ្ឋក្នុងតំបន់ អាទិភាពឬទីប្រជុំជននិងកម្មករ កម្មការិនី នៅតាមបណ្តាស្រុកនានាក្នុងខេត្ត សរុបគោលដៅប្រមាណ ៦០ ម៉ឺននាក់លើផែនការ៧៦ម៉ឺននាក់។ លោក វេជ្ជបណ្ឌិត បានបន្តថា ការចាក់វ៉ាក់សាំងនេះនឹងចាក់សម្រាប់ដូសទី១ ចាប់ពីថ្ងៃទី ១០ ដល់ថ្ងៃទី២៤ ខែមិថុនា ឆ្នាំ២០២១ និងសម្រាប់ ដូសទី២ ចាប់ពីថ្ងៃទី២៥មិថុនា ដល់ថ្ងៃទី៨ ខែកក្កដាឆ្នាំ២០២១៕

អត្ថបទ៖ សំអឿន

សូមចុចអាន៖ លោកយាយវ័យ៨០ឆ្នាំ រស់នៅម្នាក់ឯងដល់ពេលស្លាប់រកឃើញវិជ្ជមានកូវីដ