ព័ត៌មានជាតិ

Update ចាប់បានហើយ តាចាស់កាប់សម្លាប់យាយម្នាក់ព្រោះរឿងទំនាស់ព្រំដី

បានផុស

៣ years មុន

នៅ

ថ្ងៃចន្ទ ២៨ មិថុនា ២០២១

ដោយ

ឃាត.ក វ័យចំណាស់ម្នាក់ដែលកាប់សម្លាប់យាយម្នាក់គ្មានញញើតដៃស្លាប់នៅកន្លែងព្រោះតែរឿងទំនាស់ព្រំដី ទីបំផុតសមត្ថកិច្ចឃាត់ខ្លួនហើយកាលពីវេលាម៉ោង៥ល្ងាច ថ្ងៃទី២៧ ខែមិថុនា ឆ្នាំ២០២១ នៅផ្ទះជនដៃដល់តែម្តង ស្ថិតនៅភូមិឃូស្វាយ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា ក្រោយពីកើតមានអំពើឃាតកម្មយ៉ាងព្រៃផ្សៃបានកើតឡើងកាលពីវេលាម៉ោង១២និង០៥នាទីថ្ងៃត្រង់ ថ្ងៃទី២៦ខែមិថុនា ឆ្នាំ២០២១ ទៅលើជនរងគ្រោះឈ្មោះ សួ សួង ភេទស្រីអាយុ៧៤ឆ្នាំ នៅភូមិឃូស្វាយ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ រួចមក ឃាត.ក បានរត់គេចខ្លួនបាត់បានចំនួន២ថ្ងៃ។ លោកបានបន្តឲ្យដឹងទៀតថា ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំងនគរបាលស្រុកព្រះនេត្រព្រះ និងកម្លាំងនគរបាលការិយាល័យព្រហ្មទណ្ឌកម្រិតធ្ងន់ ចុះធ្វើការស៊ើបអង្កេតស្រាវជ្រាវចាំឃ្លាំមើលនៅផ្ទះជនល្មើស រហូតដល់វេលាម៉ោង៥ល្ងាចថ្ងៃទី២៧ ខែមិថុនា ឆ្នាំ២០២១ ជនដៃដល់ឈ្មោះ ចយ សឺន ភេទប្រុសអាយុ៦៧ឆ្នាំ បានដើរមកផ្ទះត្រូវកម្លាំងសមត្ថកិច្ចនគរបាលចាប់ឃាត់ខ្លួនភ្លាមៗ និងដកហូតវត្ថុតាងពូថៅពុះអុសលាក់ទុកនៅនឹងផ្ទះ១ ដែលជនដៃដល់យកទៅកាប់លើជនរងគ្រោះ។

លោកបានបញ្ជាក់បន្តថា ពាក់ព័ន្ធនឹងករណីឃាតកម្មនេះ កើតឡើងព្រោះតែជនដៃដល់ជាឃាត.ក មានទំនាស់ក្នុងរឿងព្រំដីជាប់គ្នា ជាមួយស្ត្រីរងគ្រោះកន្លងមក ។

ក្រោយឃាត់ខ្លួនជនសង្ស័យ កម្លាំងនគរបាលជំនាញព្រហ្មទណ្ឌអធិការដ្ឋាននគរបាលស្រុកព្រះនេត្រព្រះ កំពុងរៀបចំសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការបន្តតាមនិតិវិធីច្បាប់៕

អត្ថបទ ៖ វ៉ាន់ ណាង