រថយន្តបើកលឿនជ្រុលបុក​ខឿនសួនផ្លូវភ្លោះហោះទៅបុក​របងដែកឆាបឆេះ ផ្អើលសមត្ថកិច្ច

បុរសពីរនាក់ត្រូវបានកម្លាំងសមត្តកិច្ចខណ្ឌ៧មករា ធ្វើការឃាត់ខ្លួនជាបណ្តោះអាសន្ន ខណៈម្នាក់ទៀតរត់គេចខ្លួនបាត់ បន្ទាប់ពីបើករថយន្តឡិចស៊ីស មួយគ្រឿងជ្រុលទៅបុកខឿនសួនផ្លូវភ្លោះបាល់អស់ជាច្រើនកង់ ហើយបន្តទៅបុករបងដែកផ្សារបាយ័នបាក់អស់ជាច្រើនផ្ទាំងចូលទៅក្នុងបរិវេណផ្សារបន្តទៅបុករបងថ្មបន្តទៀតបណ្ដាលឲ្យបាក់អស់ជាច្រើនម៉ែត្រឯរថយន្តឆ្លងចរន្តឆាបឆេះត្រូវបងប្អូនប្រជាពលរដ្ឋជួយពន្លត់ទាន់។

ហេតុការណ៍នេះកើតឡើងកាលពីវេលាម៉ោង៣ និង ១០ នាទីទៀបភ្លឺឈានចូលថ្ងៃទី ៣០ ខែមិថុនាឆ្នាំ ២០២១ នៅចំណុចមុខផ្សារបាយ័ន តាមបណ្តោយផ្លូវសហព័ន្ធរុស្ស៊ី ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ។

ក្រោយកើតហេតុសមត្ថកិច្ចមូលដ្ឋាននិងជំនាញបានចុះមកដល់ទីតាំងកើតហេតុខាងលើនិងបានឃាត់ខ្លួនបុរសពីរនាក់រួចបញ្ជូនទៅអធិការដ្ឋាននគរបាលខណ្ឌ៧មករា ដើម្បីសួរនាំបន្ត ចំណែកម្នាក់ទៀតបានរត់គេចខ្លួនបាត់ ដោយឡែករថយន្តបង្កត្រូវវបានសមត្ថកិច្ចបានធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរងចាំធ្វើការដោះស្រាយគ្នាតាមផ្លូវច្បាប់៕ អត្ថបទ៖សុខា