ព័ត៌មានអន្ដរជាតិ

កាណាដាឡើងកម្តៅខ្លាំងសម្លាប់មនុស្សច្រើននាក់សប្តាហ៍នេះ

បានផុស

៤ years មុន

នៅ

ថ្ងៃពុធ ៣០ មិថុនា ២០២១

ដោយ

chean virakbot

មនុស្សជាច្រើននាក់បានស្លាប់នៅប្រទេសកាណាដាដោយសាររលកកម្តៅខ្លាំងមិនធ្លាប់មានដែលសីតុណ្ហភាពកើនឡើងខ្ពស់បំផុតជាប់កំណត់ត្រា។

សមត្ថកិច្ចនៅខេត្ត British Columbia បានឲ្យដឹងថា មនុស្សប្រមាណ៧០នាក់បានស្លាប់ភ្លាមៗចាប់តាំងពីថ្ងៃចន្ទមកដែលភាគច្រើនមនុស្សចាស់។ ពួកគេនិយាយថា រលកកម្តៅនៅក្នុងតំបន់ក៏ជាកត្តារួមផ្សំ។

កាលពីថ្ងៃអង្គារ៍ កាណាដាបានកត់ត្រាសីតុណ្ហភាពខ្ពស់បំផុតមិនធ្លាប់មានដល់ទៅ ៤៩.៥អង្សាសេដែលមានរយៈពេល៣ថ្ងៃជាប់គ្នានៅភូមិ Lytton ក្នុងខេត្ត British Columbia។ មុនសប្តាហ៍នេះ សីតុណ្ហភាពនៅកាណាដាមិនលើ៤៥អង្សាសេទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសឈ្មោះ Mike Kalanj ប្រចាំការនៅជាយក្រុង Burnaby បាននិយាយនៅថ្ងៃអង្គារ៍ថា ៖«សូមពិនិត្យមើលអ្នកជិតខាង ពិនិត្យមើលសមាជិកគ្រួសារ ជាពិសេសមនុស្សចាស់ អ្នកប្រហែលជាដឹង។ អាកាសធាតុនេះអាចប៉ះពាល់ដល់អាយុជីវិតអ្នកដែលងាយរងគ្រោះនៅសហគមន៍យើង។ ជាពិសេសមនុស្សចាស់ និងអ្នកដែលមានបញ្ហាសុខភាព។ វាពិតជាចាំបាច់ដែលយើងត្រូវពិនិត្យមើលពួកគាត់»។

យោងតាមប៉ូលិស កម្តៅត្រូវបានគេជឿថា រួមចំណែកគ្រោះថ្នាក់ដល់អាយុជីវិតមនុស្ស៦៩នាក់នៅជាយក្រុង Burnaby និង Surrey។ ភាគច្រើនបំផុតគឺមនុស្សចាស់ និងអ្នកមានជំងឺ។

នៅ Lytton ជាភូមិតូចមួយ ស្ត្រីឈ្មោះ Meghan Fandrich បាននិយាយថា វាស្ទើរតែមិនអាចចេញទៅក្រៅរួច។

«វាពិតជាពិបាកទ្រាំណាស់»។ អ្នកស្រីបាននិយាយ និងបន្ថែមថា អ្នកស្រីបានយកកូនស្រីតូចទៅស្នាក់នៅជាមួយគ្រួសារផ្សេងនៅខេត្ត British Columbia ដែលសីតុណ្ហភាពត្រជាក់បន្តិច។

អ្នកស្រីមានប្រសាសន៍ថា ៖«យើងកំពុងព្យាយាមស្ថិតនៅក្នុងផ្ទះតាមដែលអាចធ្វើទៅបាន។ យើងធ្លាប់ជួបកម្តៅ គឺកម្តៅស្ងួត ប៉ុន្តែ៣០សង្សាខុសគ្នាខ្លាំងនឹង៤៧អង្សា»។

ក្រសួងបរិស្ថានកាណាដាបានចេញការព្រមានរលកកម្តៅនៅខេត្ត British Columbia និង Alberta រួមទាំងតំបន់ Saskatchewan, ដែនដីពាយព្យ និងផ្នែកមួយនៅតំបន់ Yukon។

លោក David Phillips អ្នកជំនាញអាកាសធាតិនៅបរិស្ថានកាណាដា បាននិយាយថា ៖«យើងជាប្រទេសត្រជាក់បំផុតលំដាប់លេខ២ក្នុងពិភពលោក និងមានធ្លាក់ព្រិលច្រើនជាងគេ»។

«យើងតែងតែឃើញអាកាសធាតុត្រជាក់ស្រអាប់ ព្យុះព្រិល ប៉ុន្តែមិនញឹកញាប់ទេដែលយើងនិយាយពីអាកាសធាតុក្តៅបែបនេះ»។ លោកមានប្រសាសន៍ និងបន្តថា «ទីក្រុង Dubai នឹងមានអាកាសធាតុត្រជាក់ជាអ្វីដែលយើងកំពុងឃើញឥឡូវនេះ»៕

ប្រែសម្រួល៖ វីរបុត្រ
ប្រភព៖ BBC