ព័ត៌មានជាតិ

មន្រ្តីសុខាភិបាលម្នាក់បានឆ្លងកូវីដបំប្លែងថ្មីមកពីឥណ្ឌា

បានផុស

៤ years មុន

នៅ

ថ្ងៃសុក្រ ២ កក្កដា ២០២១

ដោយ

Dy Bunnara

ក្រសួងសុខាភិបាលបានបញ្ជាក់ពីការរកឃើញវិរុសកូវីដបំប្លែងថ្មី B.1.617.2 (Delta) លើមន្រ្តីសុខាភិបាលខេត្តឧត្តរមានជ័យម្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្តសញ្ញាណមន្រ្តីសុខាភិបាលដែលឆ្លងកូវីដបំប្លែងថ្មីដែលតា មិនត្រូវបានបញ្ជាក់លម្អិតទេ ខណៈខេត្តមួយនេះកំពុងផ្ទុះកូវីដបំប្លែងខ្លួនលើអ្នកដំណើរវិលមកពីថៃ។

នៅច្រកព្រំដែនអូស្មាច់ អាជ្ញាធរបានរកឃើញជាង ២០ ករណីលើអ្នកដំណើរវិលត្រឡប់ពីថៃដែលតេស្តមានវិរុសបំប្លែងខ្លួនរបស់ឥណ្ឌា

បើយោងតាមលទ្ធផលនៃការធ្វើវិភាគដោយវិទ្យាស្ថានប៉ាស្ទ័រ ប្រទេសកម្ពុជាបានរកឃើញករណីឆ្លងវិរុសកូវីដបំប្លែងថ្មីប្រភេទ B.1.617-2 (Delta) ចំនួន ២៣ នាក់ ក្នុងនោះចំនួន ១២ នាក់ នៅថ្ងៃ ២៥ ខែមិថុនា ឆ្នាំ ២០២១ និងនៅថ្ងៃទី ០១ ខែកក្កដា ឆ្នាំ២០២១ ចំនួន ១១ នាក់ ដែលជាអ្នកដំណើរវិលត្រឡប់មកពីប្រទេសថៃ។

ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានធ្វើការក្រើនរំលឹកហើយរំលឹកទៀត និងអំពាវនាវទទូចដល់សាធារណជន បងប្អូនប្រជាពលរដ្ឋបន្តការប្រុងប្រយ័ត្នខ្ពស់ ការពារខ្លួនកុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់រស់នៅរបស់ខ្លួនតាមបែបគន្លងថ្មី ដើម្បីបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ-១៩ ជាពិសេសពពួកប្រភេទបំប្លែងថ្មីនេះ។

បើតាមការសង្កេតរបស់ក្រសួងសុខាភិបាល ការចម្លងនាបច្ចុប្បន្ននេះមានសន្ទុះកើនឡើងលើយុវវ័យ ដែលក្រុមនេះបានដើរចេញក្រៅផ្ទះច្រើន ឬមានការជួបជុំមិត្តភ័ក្ត្រ។ ហេតុនេះ សូមអំពាវនាវដល់យុវវ័យគ្រប់រូប សូមចូលរួមអនុវត្ត នូវ គោលការណ៍ណែនាំរបស់ក្រសួងសុខាភិបាលដើម្បីការពារសមាជិកគ្រួសាររបស់ខ្លួន ជាពិសេស ឪពុកម្តាយ ជីដូន ជីតា ឬអ្នកមានជំងឺប្រចាំកាយនៅក្នុងគ្រួសារ ដែលជាបុគ្គលងាយរងគ្រោះ និងប្រឈមខ្ពស់ចំពោះភាពធ្ងន់ធ្ងរនៃជំងឺ ឬ ឈានទៅដល់ការស្លាប់បើមានការឆ្លងនូវ វីរុសកូវីដ-១៩នេះ៕

អត្ថបទ៖ ប៊ុណ្ណារ៉ា

Related Topics:កូវីដ-១៩