ព័ត៌មានជាតិ

តាមប្រភព អាជីវករផ្សារអូឡាំពិកមួយចំនួនឆ្លងកូវីដ កំពុងសម្រាកព្យាបាលនៅផ្ទះ

បានផុស

៤ years មុន

នៅ

ថ្ងៃចន្ទ ៥ កក្កដា ២០២១

ដោយ

អាជ្ញាធររាជធានីភ្នំពេញបានឲ្យដឹងថា មានអាជីវករផ្សារអូឡាំពិកមួយចំនួនដែលឆ្លងកូវីដ កំពុងសម្រាកព្យាបាលនៅផ្ទះ ខណៈនៅតាមមន្ទីរពេទ្យរដ្ឋ និងមណ្ឌលព្យាបាលនៅរាជធានីកកកុញដោយអ្នកជំងឺកូវីដ១៩។

ផ្សារអូឡាំពិក ដែលជាផ្សារបោះដុំទំនិញដ៏ធំកណ្តាលក្រុង បានពាក់ព័ន្ធអាជីវករ សន្តិសុខផ្សារប្រមាណជិត ៨០ នាក់ឆ្លងកូវីដ ហើយអាជ្ញាធរសម្រេចបិទជាបណ្តោះអាសន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមតួលេខគិតត្រឹមថ្ងៃ ២ កក្កដា នេះ ការយកសំណាកអ្នកពាក់ព័ន្ធនៅផ្សារអូឡាំពិកជាង ៨០០ នាក់ បានរកឃើញអ្នកវិជ្ជមានចំនួន ៧៣ នាក់។

តាមរយៈ Video Conference នៅព្រឹកមិញនេះ រដ្ឋបាលរាជធានីភ្នំពេញ និងមន្រ្តីមកពីក្រសួងសុខាភិបាល ក៏បានបើកកិច្ចប្រជុំពិភាក្សា លើការអនុវត្តការព្យាបាលតាមផ្ទះសម្រាប់អ្នកជំងឺកូវីដ១៩ ធ្វើយ៉ាងណាអាចឱ្យប្រជាពលរដ្ឋទទួលយកបាន។

លោក កើត ឆែ អភិបាលរងរាជធានីភ្នំពេញបានលើកឡើងថា កិច្ចប្រជុំនេះធ្វើឡើងដើម្បីពិភាក្សាឱ្យស៊ីសង្វាក់គ្នារវាងអាជ្ញាធរជាមួយក្រសួង និងស្ថាប័នពាក់ព័ន្ធ លើការអនុវត្តការព្យាបាលអ្នកជំងឺកូវីដនៅតាមផ្ទះ ដើម្បីបន្តផ្សព្វផ្សាយដល់អាជ្ញាធរមូលដ្ឋានតាមសង្កាត់ខណ្ឌបានយល់ពីការងារនេះ។

លោក ង៉ូវ កាង រដ្ឋលេខាធិការក្រសួងសុខាភិបាលបានថ្លែងថា ក្នុងរយៈពេល២សប្ដាហ៍ចុងក្រោយនេះ អ្នកឆ្លងជំងឺកូវីដ-១៩ មិនមានការថមថយនោះទេ តែបែរជាកើនឡើងរហូតខ្វះកន្លែងទទួលអ្នកជំងឺ។ ដូច្នេះហើយ ទើបក្រសួងបានធ្វើការជាមួយអាជ្ញាធរ ដើម្បីបង្កើតក្រមប្រតិបត្តិព្យាបាលអ្នកជំងឺនៅតាមផ្ទះ។

បើតាមមន្រ្តីក្រសួងសុខាភិបាល មកដល់ពេលនេះមានអ្នកជំងឺកូវីដប្រមាណជាង ៣០០នាក់ កំពុងសម្រាកព្យាបាលនៅតាមផ្ទះ ពិសេសបងប្អូនអាជីវករនៅផ្សារអូឡាំពិក។

ក្រសួងសុខាភិបាលកាលពីថ្ងៃទី២០ ខែមិថុនា ក៏បានដាក់ចេញនីតិវិធីប្រតិបត្តិស្តង់ដា សម្រាប់ព្យាបាលអ្នកជំងឺកូវីដ-១៩ តាមផ្ទះ ស្របពេលតួលេខអ្នកឆ្លងបានកើនឡើងជារៀងរាល់ថ្ងៃ។

ការបង្កើតក្រមប្រតិបត្តិព្យាបាលអ្នកជំងឺកូវីដ-១៩ តាមផ្ទះនេះ គឺដើម្បីកាត់បន្ថយបន្ទុកប្រព័ន្ធសុខាភិបាល ហើយការព្យាបាលតាមផ្ទះនេះ ធ្វើបានសម្រាប់តែអ្នកជំងឺកម្រិតស្រាល និងគ្មានរោគសញ្ញាប៉ុណ្ណោះ។

ផ្អែកតាមទិន្នន័យតួលេខអ្នកឆ្លងកូវីដទូទាំងប្រទេស រយៈពេល ០៣ ថ្ងៃចុងក្រោយ មួយថ្ងៃមានអ្នកឆ្លងថ្មីខ្ទង់មួយពាន់នាក់ ដែលជាតួលេខខ្ពស់បំផុតតាំងពីការផ្ទុះព្រឹត្តិការណ៍ ២០ កុម្ភៈ។

មកដល់ពេលនេះ កម្ពុជាបានកត់ត្រាតួលេខអ្នកឆ្លងកូវីដ១៩ សរុបមានចំនួន ៥៥ ១៨៧ ខណៈអ្នកស្លាប់កើនដល់ ៧៤៨ នាក់។

លោកស្រី ឱ វណ្ណឌីន រដ្ឋលេខាធិការសុខាភិបាល មានប្រសាសន៍ថ្មីៗនេះថា ស្ថានភាពកូវីដ-១៩ នៅកម្ពុជា បានឈានចូលដល់បន្ទាត់ក្រហម នៃការឆ្លងរីករាលដាលក្នុងសហគមន៍។

មន្រ្តីធ្វើការផ្នែកសុខភាពជាតិព្រមានថា តែកាលណាលើសពីបន្ទាត់ក្រហម គឺពិបាកណាស់ចូលទៅដល់ការរាតត្បាតទ្រង់ទ្រាយធំ ហើយបើឈានដល់ការរាតត្បាតទ្រង់ទ្រាយធំ នោះមូលដ្ឋានសុខាភិបាលសាធារណៈនឹងត្រូវដួលរលំ។

អ្នកនាំពាក្យក្រសួងសុខាភិបាលលើកឡើងបន្ថែមថា ស្ថានភាពពេលនោះការស្លាប់បាត់បង់ជីវិតក៏កាន់តែច្រើន ហើយវានឹងប៉ះពាល់ទាំងសេដ្ឋកិច្ចសង្គម គ្រួសារ ក៏ដូចជាសេដ្ឋកិច្ចប្រទេសជាតិទាំងមូល៕

អត្ថបទ៖ ប៊ុណ្ណារ៉ា

Related Topics:កូវីដ-១៩