កូវីដទើបធូរស្បើយបានបន្តិច! ឥណ្ឌា អនុញ្ញាតឲ្យរៀបចំពិធីបុណ្យជួបជុំទ្រង់ទ្រាយធំមួយ

មន្ត្រីជាន់ខ្ពស់មួយរូបបាននិយាយនៅថ្ងៃពុធនេះថា រដ្ឋាភិបាលនៃរដ្ឋ Uttar Pradesh នឹងអនុញ្ញាតឲ្យមានការរៀបចំពិធីបុណ្យ Kanwar Yatra ប្រចាំឆ្នាំនៅក្នុងរដ្ឋនេះ ចាប់ពីថ្ងៃទី ២៥ ខែកក្កដាទៅ ហើយក្រុមមន្ត្រីត្រូវបានស្នើសុំឲ្យសម្របសម្រួល ជាមួយរដ្ឋនានានៅជិតខាង ដើម្បីធានាថា គោលការណ៍ទប់ស្កាត់ជំងឺកូវីដ-១៩ ត្រូវបានអនុវត្តយ៉ាងខ្ជាប់ខ្ជូន។

ការអនុញ្ញាតនេះ បានធ្វើឡើងស្របពេលដែលករណីឆ្លងកូវីដក្នុងរដ្ឋនេះ ហាក់មានការធូរស្បើយបានបន្តិច។

ពិធីបុណ្យនេះ គឺជាការដងទឹកពីទន្លេគង្គា នៅខណ្ឌ Haridwar ហើយដង្ហែក្បួនជាទ្រង់ទ្រាយធំ យកទឹកទៅថ្វាយនៅប្រាសាទព្រះសិវៈនៅតាមតំបន់របស់ពួកគេ។

ទោះបីជាយ៉ាងណាក៏ដោយ រដ្ឋ Uttarakhand បានលុបចោលព្រឹត្តិការណ៍នៅឆ្នាំនេះ ដោយលើកឡើងពីបញ្ហាជំងឺរាតត្បាតកូវីដ-១៩។

លោក Navneet Sehgal រដ្ឋលេខាធិការទី២នៃរដ្ឋ Uttar Pradesh បានប្រាប់ PTI ថា “លោក Yogi Adityanath មន្ត្រីកំពូលរបស់រដ្ឋ បានស្នើឲ្យមានការសម្របសម្រួលជាមួយរដ្ឋនៅជិតខាង ដូចជារដ្ឋ Bihar and Uttarakhand ហើយធានាថា គោលការណ៍ណែនាំទប់ស្កាត់ជំងឺកូវីដ-១៩ ត្រូវបានអនុវត្តអំឡុងពិធីបុណ្យនោះ”៕

ប្រែសម្រួល៖ Vann Vann

ប្រភព៖ India Express 

ចុចអាន៖ ឥណ្ឌាអះអាងថា វីរុសបំប្លែងខ្លួន Delta ធ្វើឲ្យអ្នកជំងឺមានដំបៅរលួយ ឈានទៅដល់ការកាត់អវយវៈចោល