ថ្ងៃនេះ វៀតណាម ប្រកាសរកឃើញអ្នកឆ្លងកូវីដថ្មី នៅតែមិនថមថយ

ប្រទេសវៀតណាមនៅព្រឹកថ្ងៃចន្ទនេះ បានប្រកាសពីការរកឃើញករណីឆ្លងជំងឺកូវីដ ១៩ ក្នុងសហគមន៍ចំនួន ៦៥៩ ករណីនៅក្នុងតំបន់ចំនួន ៩ ក្នុងរយៈពេល ២៤ ម៉ោងចុងក្រោយ ដោយនាំឲ្យករណីឆ្លងសរុបឡើងដល់ ២៦,៩៣០ ករណី ។

ក្នុងចំណោមករណីឆ្លងថ្មីនេះ គ្រាន់តែទីក្រុងហូជីមិញតែឯង មានអ្នកឆ្លងរហូតដល់ ៥៤៤ ករណីទៅហើយ ក្នុងនោះ ៣៦៨ ករណីរកឃើញក្នុងតំបន់ធ្វើចត្តាឡីស័ក និងតំបន់បិទខ្ទប់ ខណៈ ១៧៥ ករណីផ្សេងទៀត មិនមានប្រភពនៃការចម្លងឡើយ ។

ចាប់តាំងពីថ្ងៃទី ២៧ ខែមេសា នៅពេលរលកឆ្លងថ្មីចាប់ផ្តើមនៅក្នុងប្រទេសវៀតណាម ការឆ្លងត្រូវបានកត់ត្រានៅក្នុងទីក្រុង និងខេត្តចំនួន ៥៨ ក្នុងចំណោមទីក្រុង និងខេត្តទាំង ៦៣ របស់ប្រទេសខណៈទីក្រុងហូជីមិញ មានករណីឆ្លងច្រើនជាងគេគឺ ១៣,២០២ ករណី ។

គួរបញ្ជាក់ថា គិតត្រឹមថ្ងៃអាទិត្យនេះ ប្រទេសវៀតណាមបានកត់ត្រាករណីឆ្លងជំងឺកូវីដ ១៩ ក្នុងសហគមន៍ចំនួន ១,៨៩៧ ករណីក្នុងនោះ ១,៥៨៦ ករណីនៅក្នុងទីក្រុងមជ្ឈមណ្ឌលហូជីមិញ ៕

ប្រែសម្រួលដោយ ៖ ជីវ័ន្ត

ប្រភព ៖ VNExpress

ចុចអាន ៖ វៀតណាម នៅតែមានអ្នកឆ្លងកូវីដជាកំណត់ត្រាក្នុងរយៈពេល ២៤ ម៉ោងចុងក្រោយ