ព័ត៌មានអន្ដរជាតិ

តាលីបង់កាន់តែរឹងមាំនៅអាហ្វហ្គានីស្ថាន ខណៈអាមេរិកដកទ័ពមិនទាន់អស់ផង

បានផុស

៣ years មុន

នៅ

ថ្ងៃព្រហស្បតិ៍ ១៥ កក្កដា ២០២១

ដោយ

ពួកតាលីបង់ត្រូវបានរាយការណ៍ពីការលើកទង់ជាតិនៅព្រំដែនសំខាន់រវាងប្រទេសអាហ្វហ្គានីស្ថាន និងប៉ាគីស្ថាន ហើយបានអះអាងថា ឥឡូវនេះស្ថិតក្រោមការគ្រប់គ្រងរបស់ខ្លួនហើយ។

វីដេអូដែលកំពុងត្រូវបានចែករំលែកតាមបណ្តាញសង្គមបង្ហាញពីទង់ជាតិពណ៌សត្រូវបានលើកនៅទីប្រជុំជនជិតទីក្រុង Kandahar។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា មន្ត្រីអាហ្វហ្គានីស្ថានបានបដិសេធចំពោះការចុះផ្សាយ បើទោះជារូបភាពត្រូវបានគេបង្ហោះលើបណ្តាញសង្គមក៏ដោយ។ ប្រព័ន្ធផ្សព្វផ្សាយ BBC ត្រូវបានគេប្រាប់ថា តាលីបង់បានកាន់កាប់ព្រំដែនដែលមិនមានភាពរឹងមាំ។

ប៉ុន្មានសប្តាហ៍ចុងក្រោយនេះ សកម្មប្រយុទ្ធតាលីបង់បានរាតត្បាតស្ទើរទូទាំងប្រទេសអាហ្វហ្គានីស្ថានទៅហើយដោយបានកាន់កាប់មូលដ្ឋានព្រំដែនជាបន្តបន្ទាប់ពីអាហ្វហ្គានីស្ថាន រាប់បញ្ចូលទាំងព្រំដែនជាមួយប្រទេសអ៉ីរ៉ង់ តាជីគីស្ថាន និងតូមិននីស្ថាន។

ពណ៌ក្រហមជាតំបន់ដែលតាលីបង់គ្រប់គ្រង តំបន់ខៀវគ្រប់គ្រងដោយរដ្ឋាភិបាលអាហ្វហ្គានីស្ថាន លឿងកំពុងប្រយុទ្ធគ្នា

ការទន្ទ្រានកាន់កាប់របស់តាលីបង់បានកើតឡើង ស្របពេលដែលសហរដ្ឋអាមេរិកបានកំណត់ពេលបញ្ចប់ការដកកម្លាំងទ័ពរបស់ខ្លួនចេញពីអាហ្វហ្គានីស្ថានត្រឹមថ្ងៃទី៣១ ខែសីហា ដែលជាកាលបរិច្ឆេទកំណត់របស់ប្រធានាធិបតីអាមេរិក ចូ បៃដិន។

ពួកតាលីបង់ដែលជាកងជីវពលឥស្លាមនិយ័មត្រូវបានរារាំងដោយកម្លាំងទ័ពអាមេរិកជិត២០ឆ្នាំហើយនោះ ឥឡូវនេះក៏បានកាន់កាប់ផ្លូវសំខាន់ៗមួយចំនួនដើម្បីកាត់ផ្តាច់ប្រភពនាំចូលសម្ភារៈទៅកាន់ទីក្រុងធំៗ។

កាលពីពេលថ្មីៗនេះ ពួកតាលីបង់បានអះអាងថា ខ្លួនបានកំពុងកាន់កាប់អាហ្វហ្គានីស្ថាន៨៥%។ មន្ត្រីតាលីបង់នៅទីក្រុងមូស្គូប្រទេសរុស្ស៊ីបាននិយាយថា ក្រុមរបស់ខ្លួនបានកាន់កាប់ស្រុកចំនួន២៥០ក្នុងចំណោមស្រុកទាំងអស់៣៩៨របស់ប្រទេសអាហ្វហ្គានីស្ថាន៕