ឱកាសបើកសាលារៀន​ឡើងវិញ ពេល​ចាក់វ៉ាក់សាំង ដល់​យុវវ័យ អាយុ ១២ ដល់១៧ ឆ្នាំរួចរាល់

លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងអំណរគុណ ដល់សម្ដេចអគ្គមហាសេនា បតី តេជោ ហ៊ុន សែន នាយករដ្ឋមន្ត្រីកម្ពុជា ដែលសម្ដេចសម្រេចបើកឱ្យមានយុទ្ធនាការចាក់វ៉ាក់សាំងជំងឺកូវីដ១៩ ដល់​យុវវ័យអាយុ ១២ ឆ្នាំដល់ ១៧ ឆ្នាំ ដែលមានចំនួនសរុបប្រមាណ ២ លាននាក់។

លោករដ្ឋមន្ត្រីក្រសួងអប់រំ បញ្ជាក់ថា “ការសម្រេចចិត្តជាយុទ្ធសាស្ត្រនេះ នឹងបង្កើនឱកាសកាន់តែច្រើនថែមទៀត ដល់ការត្រៀមបើកដំណើរការគ្រឹះស្ថានមធ្យមសិក្សាឡើងវិញជាជំហានៗ នៅពេលការចាក់វ៉ាក់សាំងការពារកូវីដ១៩ រួចរាល់នៅពេលខាងមុខ”។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី ១៦ ខែកក្កដានេះ បានផ្ញើសារពិសេសមួយជូនជនរួមជាតិ ដែលពាក់ព័ន្ធនឹង​គម្រោ​ង នៃការចាក់វ៉ាក់សាំងបង្ការជំងឺកូវីដ-១៩ជូនកុមារ និងយុវវ័យ អាយុពី១២ ដល់១៧ឆ្នាំ ក្នុងពេលពេលឆាប់ៗខាងមុខនេះ។

ប្រមុខរាជរដ្ឋាភិបាលកម្ពុជា បានលើកឡើងថា ការផ្អាកដំណើរការសាលារៀន គឺជាការខាតបង់មួយសម្រាប់​ប្រទេ​ស​ជាតិយើង ហើយប្រសិនបើយើង បានចាក់វ៉ាក់សាំងឲ្យកុមារ និងយុវជន យ៉ាងហោចណាស់យើងអាចបើក​សាលា​រៀ​ន ចាប់ពីថ្នាក់អនុវិទ្យាល័យឡើងទៅ ដែលពួកគេភាគច្រើនមានអាយុចាប់ពី១២ឆ្នាំឡើងទៅ ដែលពួកគេស្ថិតអាយុ​ប៉ុណ្ណេះ អាចជាសិស្សរៀននៅអនុវិទ្យាល័យ។

ដូច្នេះពួកគេមានលទ្ធភាព ដើម្បីការពារខ្លួនដោយការពាក់ម៉ាស នឹង​រក្សាគម្លាតនៅ​ក្នុងសង្គម ជាពិសេ​ស​​គម្លាតនៅក្នុងថ្នាក់រៀនតែម្ដង ដែលខុសប្លែកពីថ្នាក់បឋមសិក្សា ដែលកុមារមិន​ទាន់ចេះពាក់ម៉ាស ហើយក៏មិន​ទាន់​​​ចេះនូវការការពារខ្លួនតាមរបៀប រក្សាគម្លាតនោះទេ៕ ដោយៈ ឡេង ដេត