លោក បៃដិន៖ ប្រព័ន្ធផ្សព្វផ្សាយសង្គមដែលបង្ហោះព័ត៌មានមិនពិត “កំពុងសម្លាប់មនុស្ស”

កាលពីថ្ងៃសុក្រទី១៦ខែកក្កដា (ត្រូវនឹងថ្ងៃសៅរ៍នៅកម្ពុជា) ប្រធានាធិបតីសហរដ្ឋអាមេរិក លោក ចូ បៃដិន បាននិយាយថា វេទិកាប្រព័ន្ធផ្សព្វផ្សាយសង្គមដូចជា Facebook “កំពុងសម្លាប់មនុស្ស” បន្ទាប់ពីសេតវិមាន បន្តរិះគន់ក្រុមហ៊ុននេះ ដែលអនុញ្ញាតឲ្យព័ត៌មានមិនពិតអំពីវ៉ាក់សាំង ត្រូវបានផ្សព្វផ្សាយលើវេទិការបស់ខ្លួន។

នៅពេលត្រូវបានសាកសួរអំពីព័ត៌មានមិនពិត និងអ្វីដែលជាសាររបស់លោកទៅកាន់ប្រព័ន្ធផ្សព្វផ្សាយសង្គមដូចជា Facebook, លោក Biden បានប្រាប់អ្នកសារព័ត៌មានថា “ពួកគេកំពុងសម្លាប់មនុស្ស”។

ស្របពេលជាមួយគ្នានោះ អ្នកនាំពាក្យសេតវិមាន លោកស្រី Jen Psaki កាលពីព្រឹកថ្ងៃសុក្រ ក៏បានរិះគន់ក្រុមហ៊ុននេះផងដែរ។

លោកស្រីបាននិយាយក្នុងសន្និសីទសារព័ត៌មាននៅសេតវិមានថា “ច្បាស់ណាស់ មានវិធានការដែលពួកគេបានចាត់។ ពួកគេជាក្រុមហ៊ុនវិស័យឯកជន។ មានវិធានការបន្ថែមទៀតដែលពួកគេអាចធ្វើបាន។ វាច្បាស់ណាស់ថា មានវិធីជាច្រើនទៀតដែលអាចអនុវត្តបាន”។

ទោះបីជាយ៉ាងណាក៏ដោយ Facebook បានច្រានចោលការរិះគន់របស់លោក បៃដិន ដោយនិយាយថា “កិច្ចខិតខំរបស់ខ្លួន គឺពិតជាជួយសង្គ្រោះជីវិតមនុស្សបាន។ យើងនឹងមិនត្រូវបានរំខានដោយការចោទប្រកាន់ ដែលគ្មានការគាំទ្រដោយអង្គហេតុឡើយ”៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក បៃដិន និង DNC គ្រោងត្រួតពិនិត្យសារជាអក្សរ ដើម្បីបញ្ឈប់ “ព័ត៌មានក្លែងក្លាយអំពីវ៉ាក់សាំង”