ដំណឹងល្អ! វ៉ាក់សាំង Pfizer និង AstraZeneca ចំនួន ២ ដូស មានប្រសិទ្ធភាពខ្លាំងក្លាប្រឆាំងវីរុសបំប្លែងខ្លួនឥណ្ឌា

យោងតាមការស្រាវជ្រាវថ្មីមួយដោយសុខភាពសាធារណៈអង់គ្លេស (PHE) បានបង្ហាញថា វ៉ាក់សាំង Pfizer និង AstraZeneca ចំនួន ២ ដូស គឺមានប្រសិទ្ធភាពខ្ពស់ប្រឆាំងនឹងវីរុសបំប្លែងខ្លួនឥណ្ឌា “Delta” ។

ការស្រាវជ្រាវដែលត្រូវបានចុះផ្សាយកាលពីថ្ងៃពុធ ក្នុងទស្សនាវដ្តីវេជ្ជសាស្ត្រអង់គ្លេស New England Journal of Medicine បានបង្ហាញថា វ៉ាក់សាំងទាំងពីរនេះ មានប្រសិទ្ធិភាពខ្ពស់ប្រឆាំងនឹងវីរុសបំប្លែងខ្លួនឥណ្ឌា ដែលបច្ចុប្បន្នកំពុងគ្របដណ្ដប់ករណីឆ្លងនៅទូទាំងពិភពលោក ប្រសិនបើទទួលការចាក់ ២ ដូស ។

ការសិក្សាកាលពីថ្ងៃពុធបានរកឃើញថា វ៉ាក់សាំង Pfizer ចំនួន ២ ដូសមានប្រសិទ្ធភាព ៨៨ ភាគរយក្នុងការការពារជំងឺរោគសញ្ញាពីវីរុសបំប្លែងខ្លួនឥណ្ឌា ខណៈវាមានប្រសិទ្ធភាពរហូតដល់ទៅ ៩៣.៧ ភាគរយប្រឆាំងវីរុសបំប្លែងខ្លួនអង់គ្លេស “Alpha” ។

ចំណែកការចាក់វ៉ាក់សាំង AstraZeneca ចំនួន ២ ដូសមានប្រសិទ្ធិភាព ៦៧ ភាគរយប្រឆាំងនឹងវីរុសបំប្លែងខ្លួនឥណ្ឌា និង ៧៤.៥ ភាគរយប្រឆាំងវីរុសបំប្លែងខ្លួនអង់គ្លេស “Alpha” ។

គួរបញ្ជាក់ថា ដំបូងឡើយសុខភាពសាធារណៈអង់គ្លេស (PHE) ធ្លាប់បាននិយាយថា ដូសដំបូងនៃវ៉ាក់សាំងទាំងពីរមានប្រសិទ្ធិភាពប្រហែល ៣៣ ភាគរយប្រឆាំងនឹងរោគសញ្ញាពីវីរុសបំប្លែងខ្លួនឥណ្ឌា ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ វៀតណាម ប្រកាសចាក់វ៉ាក់សាំង Pfizer និង AstraZeneca លាយបញ្ចូលគ្នា