ឆ្លងកាត់វិថីសិល្បៈ​ជាង ៣០ឆ្នាំ តារាជើងចាស់ ទេព រិន្ទដារ៉ូ ​ទទួល​ពាន​និង​មេដាយ​រាប់​មិន​អស់

ភ្នំពេញ៖ រហូតមកទល់បច្ចុប្បន្នតារាសម្ដែងជើងចាស់ លោក ទេព រិន្ទដារ៉ូ បានប្រឡូកក្នុងវិស័យសិល្បៈ​រយ:​ពេល​​ប្រមាណ​ជាង ៣០ឆ្នាំហើយ ខណ:ប្រជាប្រិយភាពនៅតែរក្សាបានការគាំទ្រខ្ពស់។

ជាមួយ​​ស្នាដៃ​សម្តែង​ខ្សែ​ភាពយន្តអស់៣០ឆ្នាំ តារា​សម្តែង​ជើង​ចាស់លោក​ ទេព រិន្ទដារ៉ូ​ នៅ​តែ​​រក្សាបាន​ប្រជាប្រិយភាពរបស់ខ្លួន ទោះ​បី​ជា​វិស័យ​ខ្សែ​ភាព​យន្ត​ខ្មែរ​បច្ចុប្បន្ន ហាក់កំពុងជាប់គាំងដោយសារ​វិបត្តិ​កូវីដ-១៩​ក្តី។

ដោយឡែកបើចាប់អារម្មណ៍លើស្នាដៃសម្តែងកន្លងមកនេះ គឺតារាវ័យ៤៨ឆ្នាំ លោក ទេព រិន្ទដារ៉ូ បានពង្រឹងកេរ្តិ៍ឈ្មោះល្បីល្បាញ ដែលអាចក្តោបក្តាប់បានទីផ្សារសិល្ប:​ពេញដៃ។ មិនតែប៉ុណ្ណោះ​ ថ្មីៗនេះលោកក៏បានបង្ហាញស្នាដៃនៃសមិទ្ធផល​ពានរង្វាន់​ និង​មេដាយជាច្រើនមិនធ្លាប់មាននរណាដឹង។

ទម្លាយភ្ជាប់ជាមួយសមិទ្ធផលពានរង្វាន់ និង​មេដាយ​ជាច្រើន លោក ទេព រិន្ទដារ៉ូ បានបញ្ជាក់ថា ទាំងនេះគឺជា​សមិទ្ធផល​ពានរង្វាន់​ និង​មេដាយនៃការសម្តែងរយ:ពេល៣០ឆ្នាំកន្លងមកនេះ។ ដោយសារហេតុផលនេះទើបតារាសម្តែងលោក ទេព រិន្ទដារ៉ូ អាចចងចិត្តទស្សនិកជន ឲ្យនៅតែមានចង់ចាំឈ្មោះលោកនិងរក្សា​ទីផ្សារ​នៃការ​គាំទ្រ៕

អត្ថបទ៖ ចាន់រ៉ា