ក្រសួងធនធានទឹក ៖ តំបន់ទំនាប ក្នុងខេត្តនៅអបមាត់ទន្លេមេគង្គលើ នឹងអាចរងការជន់ លិច

ក្រសួងធនធានទឹក និងឧតុនិយម នៅថ្ងៃទី២៦ ខែកក្កដា ឆ្នាំ២០២១នេះ បានចេញសេចក្ដីជូនដំណឹង ស្ដីពី ស្ថានភាពទឹកទន្លេមេគង្គ។ សេចក្ដីជូនដំណឹង បានឲ្យដឹងថា នៅក្នុងរយៈពេលកន្លងមក ព្យុះទី៧ សេមប៉ាកា (CEMP​AKA) និងបណ្ដាឥទ្ធិពល​ នៃព្យុះផ្សេងៗទៀត និងប្រព័ន្ធនានា ដែលមានឥទ្ធិពលមកលើអាងទន្លេមេគង្គ បានធ្វើឲ្យ​មានភ្លៀងធ្លាក់ក្នុងកម្រិត ពីបង្អួរ ទៅច្រើន ក្នុងអាងទន្លេមេគង្គភាគខាងលើ រួមមាន៖ ប្រទេសចិន ថៃ និងប្រទេស​ឡាវ ព្រមទាំងតំបន់ខ្ពង់រាប ភាគឥសានប្រទេសកម្ពុជាផងដែរ។

តាមក្រសួងធនធានទឹក និងឧតុនិយម ស្ថានភាពបែបនេះ បានធ្វើឲ្យទឹកទន្លេមេគង្គហក់ឡើង ហើយនឹង​បន្តឡើង​ក្នុងរយៈពេពី៣ ទៅ៤ថ្ងៃខាងមុខទៀត ដែលអាចបណ្ដាលឲ្យជន់លិចតំបន់ទំនាប អបមាត់ទន្លេមេគង្គ លើ នៅខេត្ត​ស្ទឹងត្រែង ក្រចេះ កំពង់ចាម និងខេត្តត្បូងឃ្មុំ។ តែការហក់ឡើងនេះ មិនទាន់ដល់កម្រិតកម្ពស់ ដែល​ត្រូវឲ្យមានកា​រប្រុង​ប្រយ័ត្ន នៅឡើយនោះទេ។

យ៉ាងណាក៏ដោយក្រសួងធនធានទឹក និងឧតុនិយម តាមរយៈសេចក្ដីជូនដំណឹងរបស់ខ្លួន បានអំពាវនាវដល់​សាធារ​ណជន អាជ្ញាធរដែនដីពាក់ព័ន្ធ ជាពិសេសប្រជាពលរដ្ឋ ដែលរស់នៅអមសងខាងទន្លេមេគង្គ និងតំបន់​ទំនាប​នានា ជ្រាបជាព័ត៌មាន និងរួសរាន់ប្រមូលកសិផល ឲ្យបានទាន់ពេលវេលា និងបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕ (ដោយ)៖ ឃួន សុភ័ក្រ