ការប្រឡងបាក់ឌុបឆ្នាំនេះ​ នឹងត្រូវរៀបចំឡើង​តាមការគ្រោងទុក

បើគ្មានអ្វីប្រែប្រួលនោះទេ ការប្រឡងបាក់ឌុបឆ្នាំនេះនឹងត្រូវរៀបចំឡើង នៅថ្ងៃទី ០៦ ខែធ្នូ ឆ្នាំ ២០២១។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់កម្ពុជាថ្មី នៅថ្ងៃទី ២៨ ខែកក្កដា នេះ​ថា ការប្រឡងបាក់ឌុប នឹងត្រូវអនុវត្តតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។​

ក្រសួងអប់រំ យុវជន និងកីឡាបានកំណត់សម័យប្រឡងបាក់ឌុបថ្នាក់ជាតិ សម្រាប់សាលារដ្ឋនៅថ្ងៃទី០៦ ខែធ្នូ ២០២១។

ដោយឡែកសម្រាប់សាលាឯកជន និងត្រូវរៀបចំឡើង នៅថ្ងៃទី ២៥ ខែតុលា ដែលតម្រូវឱ្យរៀបចំមណ្ឌលប្រឡងដាច់ដោយឡែកពីគ្នារវាងថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម រួច​បញ្ជូនមកក្រសួងអប់រំ តាម រយៈមន្ទីរអប់រំ យុវជន និងកីឡារាជធានី ខេត្តដើម្បី​ពិនិត្យនិងសម្រេច។

អ្នកនាំពាក្យក្រសួងអប់រំ បញ្ជាក់ថាក្នុងករណីសាលាឯកជនមិនមានលទ្ធភាពរៀបចំការ​ប្រឡង​ដោយ​ខ្លួនឯង ត្រូវចូលរួមប្រឡងជាមួយសិស្សនៃសាលារដ្ឋនៅពេលក្រោយ តាមការជូន​ដំណឹង​របស់ក្រសួង។

ក្រសួងអប់រំ យុវជន និងកីឡា មិនទាន់បង្ហាញតួលេខបេក្ខជនដែលនឹងត្រូវប្រឡងឆ្នាំនេះនោះទេ ខណៈកាល ពីឆ្នាំមុន មានបេក្ខជនដែលបានដាក់ពាក្យប្រឡងប្រមាណជាង ១២ ម៉ឺននាក់៕

ដោយៈ ឡេង ដេត