ខេត្ត​តាកែវ​សាងសង់ផ្សារណាត់ថ្មីកម្ពស់​ ៣ ជាន់ គ្រោង​រួច​រាល់​នៅដើម​ឆ្នាំ​២០២២

ខេត្តតាកែវ៖ ព្រឹកថ្ងៃទី២៨ ខែកក្ដដា ឆ្នាំ២០២១នេះ លោក កង អាណាន់ អភិបាលនៃគណៈអភិបាលក្រុងដូនកែវ រួម​ទាំង​ម្ចាស់វិនិយោគគំរោងសាងសង់ផ្សារណាត់ទំនើបខ្នាតតូច បានចុះពិនិត្យការដ្ឋានកំពុងដំណើរការស្ថាបនាស្ថិតនៅភូមិ១ សង្កាត់រកាក្នុង ក្រុងដូនកែវ ខេត្តតាកែវ។

លោក កង អាណាន់ អភិបាលក្រុងដូនកែវ បានធ្វើការណែនាំដល់ម្ចាស់គំរោងវិនិយោគផ្សារ និងមេការជាងទាំងអស់ ត្រូវពិនិត្យនិងតាមដានគុណភាពសំណង់ ឱ្យបានត្រឹមត្រូវតាមស្ដង់ដារបច្ចេកទេស ព្រមទាំងពន្លឿនការសាងសង់ ឲ្យបានឆាប់រហ័សជាទីបំផុត ដើម្បីឲ្យបានបងប្អូនក្រុមអាជីវករចូលលក់ដូរវិញបានឆាប់រហ័ស ។

ដោយឡែកបើតាមការបញ្ជាក់ពី លោក ឡោ ជំនិត ប្រធានវិនិយោគបានឱ្យដឹងថា បច្ចុប្បន្ននេះសំណង់អាគារផ្សារដែលមានទំហំ១៥ម៉ែត្រ គុណ៨០,១៥ ម៉ែត្រ មានកម្ពស់០៣ជាន់គឺសម្រេចការសាងសង់បានជាង​៣០​ភាគរយ គ្រោងបញ្ចប់​នៅខែមេសាឆ្នាំ២០២២ខាងមុខ ហើយសម្រាប់ជាន់ផ្ទាល់ដី គឺនៅដើមឆ្នាំ២០២២នេះ បងប្អូនអាជីវករអាចចូលមកលក់ដូរបានវិញជាធម្មតា៕

អត្ថបទ៖ វីរៈ