ធ្ងន់ហើយ ! រឿងបណ្តឹង សុខ រ៉ាស៊ី ចំពោះលោក អ៊ិន សុភិន ឡើងដល់តុលាការហើយ

ទីបំផុតរឿងក្តីក្តាំរវាងពិធីករ សុខ រ៉ាស៊ី និងលោក អ៊ិន សុភិន ដែលជាថៅកែផលិតកម្មមហាហង្ស ពេលនេះឈានដល់តុលាការហើយ ខណ:ការសម្របសម្រួលគ្នាលើកទី១នៅស្នងការដ្ឋាននគរបាលរាជធានីភ្នំពេញ ពុំទទួលបានលទ្ធផល។

បើតាមការបញ្ជាក់ពីលោក សុខ រ៉ាស៊ី បានឲ្យដឹងថា ករណីរឿងក្តីក្តាំរបស់លោកពេលនេះ ត្រូវចូលដល់តុលាការហើយ។ លោកសង្ឃឹមថា យុត្តិធម៌នឹងមានចំពោះជនរងគ្រោះដូចរូបលោក ព្រោះរឿងនេះភាគីដែលជំពាក់លុយហាក់មានចេតនាផ្គើនណាស់។

លោក សុខ រ៉ាស៊ី បានបន្តថា កំចាត់ជនពាលក្នុងសង្គមអោយបានបំពេញបំណងចុងចោទអោយរៀងចាលកុំអោយដើរធ្វើបាបអ្នកដ៏ទៃទៀត លើកទីមួយហើយចូលតុលាការ សូមជួយចែករំលែករកយុត្តិធម៌ផង។

លោកនិយាយទៀតថា មួយឆ្នាំហើយ លោកតាមអង្វរគេដូចឆ្កែអោយសងលុយមក មួយខែបង់អោយខ្ញុំ ៥០០ដុល្លារឬ១០០០ដុល្លារក៏បានដែរ ដើម្បីយកលុយបង់ធនាគារ បង់ថ្លៃឃ្លាំងនិងបើកអោយកម្មករ តែក្តីអាណិតលោកតែមួយចុងក្រចកក៏គ្មានដែរ។

សុខ រ៉ាស៊ី លើកឡើងថា លោកលក់ឡាន ជិះម៉ូតូទៅធ្វើការ ដាក់លក់ផ្ទះ លក់គ្រឿងអលង្ការ បើកលុយអោយបុគ្គលិក លោកដើរពឹងគេអោយជួយនិយាយសម្រុះសម្រួលតែលទ្ធផលគ្រប់គ្នាសុទ្ធតែបញ្ចាក់ថា អស់លទ្ធភាព និយាយជាមួយគាត់នេះហើយគាត់មិនសងទេ បានជំរើសចុងក្រោយមានតែពឹងច្បាប់ជាអ្នកដោះស្រាយ។

ជុំវិញរឿងរ៉ាវខាងលើនេះ លោក អ៊ិន សុភិន ដែលជាថៅកែមហាហង្ស កម្ពុជាថ្មី មិនទាន់អាចស្វែងរកការបកស្រាយបាននៅឡើយទេនាព្រឹកថ្ងៃទី៣១ ខែកក្កដា ឆ្នាំ២០២១នេះ ខណ:មហាជនជាច្រើនកំពុងរង់ចាំមើលលទ្ធផលពីតុលាការផងដែរ៕

អត្ថបទ ៖ ចាន់រ៉ា