មនុស្សចាស់នៅ អ៊ីស្រាអែល ទទួលការចាក់វ៉ាក់សាំងដូសទី ៣ មុនគេ

រដ្ឋាភិបាលអ៊ីស្រាអែលកំពុងផ្តល់វ៉ាក់សាំងការពារជំងឺកូវីដ ១៩ ដូសទី ៣ ដល់មនុស្សដែលមានអាយុលើសពី ៦០ ឆ្នាំ ដើម្បីទប់ស្កាត់ការរីករាលដាលនៃវីរុសបំប្លែងខ្លួនឥណ្ឌា “Delta” ដែលអាចចម្លងបានយ៉ាងឆាប់រហ័ស ។

យុទ្ធនាការចាក់ដូសបន្ថែមនេះ បានចាប់ផ្តើមកាលពីថ្ងៃអាទិត្យ ។ រដ្ឋាភិបាលនិយាយថា ចំនួនពលរដ្ឋដែលចាក់វ៉ាក់សាំងហើយ ហើយឆ្លងជំងឺកូវីដ ១៩ បានកើនឡើងរោគសញ្ញាធ្ងន់ធ្ងរ ។

អ៊ីស្រាអែលមានប្រជាជន ៩.៣ លាននាក់ ខណៈមនុស្សជាង ៨០ ភាគរយដែលមានអាយុចាប់ពី ១៦ ឆ្នាំឡើងទៅ បានទទួលវ៉ាក់សាំងចំនួន ២ ដង ។

កន្លងមក ចំនួននៃករណីឆ្លងប្រចាំថ្ងៃជាបណ្តោះអាសន្ន នៅអ៊ីស្រាអែលបានធ្លាក់ចុះមកក្រោម ១០ ករណីប៉ុណ្ណោះ ប៉ុន្តែនៅប៉ុន្មានថ្ងៃថ្មីៗនេះ តួលេខឆ្លងថ្មីបានកើនឡើង ២ ពាន់ករណី ។

ទន្ទឹមនោះ គិតត្រឹមថ្ងៃអាទិត្យ ប្រទេសនេះមានអ្នកជំងឺកូវីដចំនួន ២១២ នាក់មានរោគសញ្ញាធ្ងន់ធ្ងរ ហើយវាគឺជាការកើនឡើងជាង ១៨០ នាក់ពីមួយខែមុន ។

គួរបញ្ជាក់ថា គិតត្រឹមពេលនេះ ប្រទេសអ៊ីស្រាអែល មានករណីឆ្លងជំងឺកូវីដ ១៩ ជាង ៨៧ ម៉ឺនករណី និងមានអ្នកស្លាប់ ៦,៤៧៧ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល នឹងចាក់វ៉ាក់សាំងដូសទី ៣ ដល់ប្រជាជនចំណាស់អាយុ ៦០ ឆ្នាំឡើងទៅ