ហួសចិត្ត​មនុស្សម្នា​​​គេខ្លាចកូវីដ​​ បែរជាប្រជុំគ្នាផឹកស៊ី ច្រៀងទាំងកណ្ដា​ល​ថ្ងៃ

អ្នករស់នៅក្នុងភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ នឹកហួសចិត្តនឹងមនុស្សមួយក្រុមនាំគ្នាចាក់ធុងបាស់ផឹកសុីច្រៀងលេងយ៉ាងសប្បាយទាំងកណ្តាលថ្ងៃត្រង់រកដេកពួនមិនបានក៏ទូរសព្ទ័ប្តឹងទៅសមត្ថកិច្ចឲ្យចុះមកបង្ក្រាប។

ក្រុមផឹកសុីដូចជាឆ្លាតជាងសមត្ថកិច្ចដោយគ្រាន់តែឭសន្ធឹកម៉ូតូរបស់សមត្ថកិច្ចនាំគ្នារត់ចែកជើងគ្នាបាតជើងសព្រាតចោលបទភ្លេង (មាននឹកបងទេអូន)។

ហេតុការណ៍នេះបានកើតឡើងនៅវេលាម៉ោង ១៖៤៧ រសៀលថ្ងៃទី ៣ ខែសីហា នៅភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។

នាយនគរបាលប៉ុស្តិ៍ ស្ទឹងមានជ័យ៣ លោក ឯម ភារី ប្រាប់កម្ពុជាថា ពិតជាមានមនុស្សមួយក្រុមបានជួបជុំគ្នាផឹកសុីចាក់ធុងបាស់ច្រៀងលេងមិនរក្សាគម្លាតធ្វើឱ្យប្រជាពលរដ្ឋមានការភ័យខ្លាចឆ្លងជំងឺកូវីដប្រភេទថ្មី ហើយប្ដឹងមកសមត្ថកិច្ចឱ្យចុះបង្ក្រាប។

លោកនាយប៉ុស្តិ៍បន្តថា ពេលកម្លាំងនគរបាលប៉ុស្តិចុះទៅដល់ក៏ស្រាប់តែពួកគាត់រត់ចែកជើងគ្នាអស់បន្សល់ទុកតែសាច់ក្លែម និងស្រាបៀតែប៉ុណ្ណោះ។

ការចុះទៅបង្ក្រាបនេះកម្លាំងនគរបាលប៉ុស្តិ៍បានដកហូតយកធុងបាស់មករក្សាទុកនៅស្នាក់ការដោយមិនអនុញាតិឱ្យវិញនោះទេ រហូតដល់បញ្ចប់បម្រាមជួបជុំគ្នាផឹកសុី៕

ដោយៈ នរា