រុស្ស៊ី ប្រាប់តម្លៃវ៉ាក់សាំង Spunik V ដែលគ្រប់គ្នាពេញចិត្តស្តូក

យោងតាមមូលនិធិវិនិយោគផ្ទាល់របស់រុស្ស៊ីបានឲ្យដឹងថា វ៉ាក់សាំងប្រឆាំងវីរុសកូរ៉ូណារបស់ប្រទេសរុស្ស៊ីដែលមានឈ្មោះថា Sputnik V គឺមានប្រសិទ្ធភាពជាង៩០ភាគរយហើយមានតម្លៃមិនដល់១០ដុល្លារទេក្នុងមួយដូសដែលតម្លៃនេះប្រហែលជាមនុស្សគ្រប់គ្នាអាចទទួលយកបាន។

លទ្ធផលបណ្តោះអាសន្ននេះត្រូវបានប្រកាសតាមរយៈសន្និសីទតាមវីដេអូដែលរៀបចំជាបន្ទាន់និងសេចក្តីប្រកាសព័ត៌មានមួយនៅព្រឹកនេះ។ ទោះបីជាយ៉ាងណាក៏ដោយ មិនទាន់មានទិន្នន័យណាមួយត្រូវបានចេញផ្សាយនៅឡើយទេ។

វ៉ាក់សាំង Sputnik V របស់ទីក្រុងមូស្គូត្រូវបានបង្កើតឡើងដោយមជ្ឈមណ្ឌលស្រាវជ្រាវរោគរាតត្បាតនិងមីក្រូជីវសាស្រ្តជាតិ N F Gamaleya ដែលគ្រប់គ្រងដោយរដ្ឋក្នុងទីក្រុងមូស្គូ។

ការប្រកាសនៅថ្ងៃនេះបានធ្វើឡើងមួយថ្ងៃបន្ទាប់ពីសាកលវិទ្យាល័យ Oxford ប្រកាសថា វ៉ាក់សាំងរបស់ខ្លួនដែលត្រូវបានអភិវឌ្ឍជាមួយក្រុមហ៊ុនឱសថយក្ស AstraZeneca មានប្រសិទ្ធភាព៩០ភាគរយ។

វ៉ាក់សាំង Sputnik V នឹងមានតម្លៃ១០ដុល្លារឬ៧ផោនក្នុងមួយដូសចំណែកវ៉ាក់សាំងរបស់ Oxford ត្រូវបានគេរំពឹងថាមានតម្លៃត្រឹមតែ២.៦៧ដុល្លារប៉ុណ្ណោះក្នុងមួយដូស។

ទោះបីជាយ៉ាងណាក៏ដោយ វ៉ាក់សាំងរបស់រុស្ស៊ីនឹងមានតម្លៃថោកជាងវ៉ាក់សាំង mRNA ដែលផលិតដោយក្រុមហ៊ុន Pfizer ដែលមានតម្លៃ១៩.៧៧ដុល្លារក្នុងមួយដូសនិងវ៉ាក់សាំងរបស់ក្រុមហ៊ុន Moderna ដែលមានតម្លៃ៣២ដុល្លារក្នុងមួយដូស។

វាត្រូវបានគេរំពឹងថានឹងអាចប្រើបាននៅខែកុម្ភៈឆ្នាំ២០២១ហើយប្រទេសរុស្ស៊ីសង្ឃឹមថានឹងអាចផលិតបាន៥០០លានដូសក្នុងមួយឆ្នាំ៕

ប្រែសម្រួលដោយ៖ Vann Vann

ប្រភព៖ Daily Mail