បារម្ភវ៉ាក់សាំងសល់ទុកចោលច្រើន ពេលនេះ UN ចេញមុខលូកដៃ

អ្នកនាំពាក្យអង្គការសហប្រជាជាតិបាននិយាយកាលពីថ្ងៃព្រហស្បតិ៍ទី ៥ ខែសីហាថា UN មានការព្រួយបារម្ភយ៉ាងខ្លាំង អំពីស្ថានភាពដែលវ៉ាក់សាំងការពារជំងឺកូវីដ -១៩ មិនត្រូវបានប្រើប្រាស់។

យោងតាមទិន្នន័យពីអង្គការ UNICEF បានឲ្យដឹងថា កម្មវិធីចែករំលែកវ៉ាក់សាំងកូវីដ COVAX បានចែកចាយថ្នាំបង្ការចំនួន ១៨៦.២ លានដូស ដល់ប្រទេសចំនួន ១៣៨។

COVAX មានគោលបំណងធានាការចែកចាយឲ្យបាន ២ពាន់លានដូស សម្រាប់ប្រទេសដែលមានប្រាក់ចំណូលទាបនិងមធ្យមនៅត្រឹមចុងឆ្នាំ ២០២១នេះ។

អ្នកនាំពាក្យ UN លោក Stephane Dujarric បានប្រាប់អ្នកយកព័ត៌មានថា “យើងមានការព្រួយបារម្ភយ៉ាងខ្លាំង ចំពោះស្ថានភាពដែលយើងបានឃើញ វ៉ាក់សាំងមិនត្រូវបានគេប្រើ ទុកចោល។

UN បានត្រៀមខ្លួនរួចជាស្រេច ដើម្បីជួយដល់ប្រទេសនានាជាមួយនឹងការចែកចាយវ៉ាក់សាំង ដូចជាការដឹកជញ្ជូន ការចែកចាយខ្សែសង្វាក់ត្រជាក់ ការប្រយុទ្ធប្រឆាំងនឹងភាពស្ទាក់ស្ទើរទៅចាក់វ៉ាក់សាំង ប៉ុន្តែអាចធ្វើទៅបាន លុះត្រាមានសំណើពីរដ្ឋាភិបាល។

ស្របពេលជាមួយគ្នានោះដែរ សេតវិមានបាននិយាយកាលពីថ្ងៃអង្គារថា សហរដ្ឋអាមេរិកបានបរិច្ចាគវ៉ាក់សាំងចំនួន ១១០ លានដូសដល់ប្រទេសជាង ៦០ ហើយ ដែលភាគច្រើនត្រូវបានចែករំលែកតាមរយៈកម្មវិធី COVAX។

នៅចុងខែសីហានេះ ទីក្រុងវ៉ាស៊ីនតោននឹងចាប់ផ្តើមដឹកជញ្ជូនវ៉ាក់សាំងចំនួន ៥០០ លានដូសបន្ថែមទៀត ទៅកាន់ប្រទេសដែលមានប្រាក់ចំណូលទាបចំនួន ១០០៕

ប្រែសម្រួល៖ Vann Vann

ប្រភព៖ CNA

ចុចអាន៖ ប្រទេសធំៗនៅតែបន្តចាក់វ៉ាក់សាំងដូសទី៣ មិនខ្វល់ការអំពាវនាវរបស់ WHO