ព័ត៌មានជាតិ

អាជ្ញាធរស្រុកសៀមប៉ាង បង្កើតផ្លូវធម្មជាតិមួយខ្សែ ឱ្យទៅជាផ្លូវគ្រួសក្រហម ក្នុងឃុំសន្តិភាព

បានផុស

៤ years មុន

នៅ

ថ្ងៃអង្គារ ១០ សីហា ២០២១

ដោយ

អាជ្ញាធរស្រុកសៀមប៉ាង បានស្ថាបនាផ្លូវគ្រួសក្រហម ប្រវែង៨គីឡូម៉ែត្រ ដើម្បីបម្រើការធ្វើចរាចរណ៍ជូនប្រជាពលរដ្ឋទាក់ទាងគ្នាពី(ភូមិគីរីបាស់លើ ទៅភូមិគីរីវង្សាលើ) ក្នុងឃុំសន្តិភាព ដែលពីមុននោះ ជាផ្លូវលំធម្មជាតិ ឬហៅថា(ផ្លូវរទេះគោ)តែប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផាន់ យុទ្ធ អភិបាលស្រុកបានបញ្ជាក់នៅថ្ងៃទី១០សីហានេះថា ផ្លូវនេះស្ថិតនៅក្នុងឃុំសន្តិភាព ស្រុកសៀមប៉ាង ពីមុនគ្រាន់តែជាផ្លូវធម្មជាតិតែប៉ុណ្ណោះ ឬគេហៅថាផ្លូវរទេះគោ ពេលនេះ បានឈូសឆាយស្ថាបនាជាផ្លូវគ្រួសក្រហមជំហានទីមួយ យើងបានកែសម្រួលរួចរាល់ ហើយនៅខែវស្សានេះ ត្រូវផ្អាកមួយរយៈសិន ព្រោះគ្រឿងចក្រពិបាកចូលដីផុងធ្វើមិនធ្វើបាន។ លោកបន្តថា ផ្លូវនេះមានគម្រោងធ្វើតភ្ជាប់ទៅដល់ទឹកដីខេត្តរតនគីរី ដោយឆ្លងកាត់ភូមិចំនួន៤ មានភូមិគីរីវង្សាលើ-វង្សាក្រោម-គីរីបាស់លើនិងគីរីបាស់ក្រោម ក្នុងចម្ងាយផ្លូវជាង១៤គីឡូម៉ែត្រ ដែលបងប្អូនជនជាតិការវែតរស់នៅ។

លោក សំ ប៊ុនធិន អភិបាលរងស្រុកសៀមប៉ាងបានទទួលស្គាល់ថា ការបង្កើតឱ្យមានផ្លូវស្ពាននៅតាមមូលដ្ឋានជាការអនុវត្តនូវគោលនយោបាយរបស់រាជរដ្ឋាភិបាល ដើម្បីកែប្រែជីវភាពរស់នៅរបស់ប្រជាពលរដ្ឋហើយផ្លូវនេះ យើងធ្វើជំហានទីមួយ៨គីឡូម៉ែត្រសិនជាការចំណាយថវិការបស់មូលនិធិឃុំ។

លោក ប៉ាង ច្រែស ជនជាតិការវែតតំណាងឱ្យប្រជាពលរដ្ឋនៅភូមិទាក់ទាម ឃុំសន្តិភាពបានសំដែងការសាទរចំពោះអាជ្ញាធរស្រុក ដែលបានយកចិត្តទុកដាក់បង្កើតឱ្យមានផ្លូវមួយខ្សែនេះ ព្រោះផ្លូវបានផ្តល់ប្រយោជន៍សំខាន់ជាពិសេសបងប្អូនជនជាតិ(ការវែត)ស្រួលធ្វើដំណើរទាក់ទងគ្នាពីភូមិឃុំមួយទៅភូមិមួយ ហើយពេញចិត្តបានដឹកជញ្ជូនកសិផលចេញចូលផងនិងប្រើប្រាស់អ្វីបានគ្រប់យ៉ាង។

សូមបញ្ជាក់ថា នៅក្នុងឃុំសន្តិភាពមានភូមិចំនួន៦ ក្នុងនោះភូមិចំនួន៤ពុំទាន់មានផ្លូវធ្វើដំណើរស្រួលបួលនោះទេ ទើបអាជ្ញាធរស្រុកសៀមប៉ាងរៀបចំស្ថាបនាឱ្យមានផ្លូវនេះឡើង ចាប់ចេញពី ភូមិគីរីបាស់លើ ទៅភូមិគីរីវង្សាលើ ជាជំហានទីមួយដើម្បីបានបងប្អូនជនជាតិ(ការវែត)ស្រួលចេញចូលទំនាក់ទំនងគ្នាដោះស្រាយផ្នែកសេដ្ឋកិច្ចក្នុងគ្រួសារ៕

អត្ថបទ៖ ងិនលីម

Related Topics:ការស្ថាបនាផ្លូវ