ខេត្តព្រៃវែង មានអ្នកឆ្លងកូវីដជាង៥ពាន់នាក់ និងស្លាប់ជិត១០០នាក់

ខេត្តព្រៃវែង ជាខេត្តមួយក្នុងចំណោមខេត្តដទៃទៀតដែលផ្ទុះឆ្លងជំងឺកូវីដ-១៩ ធ្ងន់ធ្ងរ ដែលធ្វើឲ្យខេត្ត​នេះ​មាន​ចំនួនអ្នកឆ្លងជំងឺដ៏កាចសាហាវនេះ កើនឡើងជាង៥ពាន់នាក់ ចាប់ពីមានការផ្ទុះឆ្លងរាលដាលចូលក្នុង​សហគមន៍ និងមានអ្នកស្លាប់ជិត១០០នាក់។

យោងតាមរបាយការណ៍ប្រចាំថ្ងៃរបស់រដ្ឋបាលខេត្តបានបង្ហាញថា គិតត្រឹមថ្ងៃទី១០ ខែសីហា ឆ្នាំ២០២១ នេះ ខេត្តព្រៃវែងមានអ្នកឆ្លងជំងឺកូវីដ-១៩ សរុប ៥,០៤៦នាក់ ខណៈអ្នកស្លាប់ដោយសារជំងឺកូវីដ-១៩ នេះ មានចំនួន៨៨នាក់។

រដ្ឋបាលខេត្តបានបង្ហាញថា ក្នុងចំណោមអ្នកជំងឺទាំង ៥,០៤៦នាក់ មាន ៣,៩០៧នាក់ បានជាសះស្បើយ និង១,០៥១នាក់ កំពុងសម្រាកព្យាបាលនៅតាមមន្ទីរពេទ្យក្រុង-ស្រុក នៃខេត្ត។

សូមបញ្ជាក់ថា នៅថ្ងៃទី១០ ខែសីហា នេះ រដ្ឋបាលខេត្តព្រៃវែង បានរកឃើញអ្នកឆ្លងជំងឺកូវីដ-១៩ ថ្មី​ចំនួន​៦៤​នាក់បន្ថែមទៀត ក្នុងនោះមានស្រី៤៤នាក់៕

អត្ថបទ ៖ សុខុម