មន្ត្រីជំនាញ ៖ បើ ថៃ អនុវត្តគោលការណ៍ទាំងនេះ ករណីឆ្លង និងស្លាប់ដោយសារកូវីដនឹងធ្លាក់ចុះ

មន្រ្តីសុខាភិបាលថៃលោក Yongyot Thammawut សង្ឃឹមថា ការធ្វើតេស្តទ្រង់ទ្រាយធំ និងការធ្វើចត្តាឡីស័កក្នុងរយៈពេល ២ សប្តាហ៍ខាងមុខ អាចកាត់បន្ថយករណីឆ្លងជំងឺកូវីដ ១៩ នៅទីក្រុងបាងកក ។

លោកវេជ្ជបណ្ឌិតបាននិយាយថា ក្រុមគ្រូពេទ្យចំនួន ៤១ ក្រុមដែលមានសមាជិកចំនួន ៤០០ នាក់ និងបុគ្គលិកថែទាំសុខភាពដទៃទៀត បាននិងកំពុងធ្វើតេស្តទ្រង់ទ្រាយធំនៅក្នុងរាជធានី និងខេត្តភាគកណ្តាលដទៃទៀត ចាប់តាំងពីដើមខែនេះ ។

លោក Yongyot និយាយថា ក្រុមនេះបានធ្វើតេស្តនៅទូទាំងសហគមន៍ចំនួន ១០០ រួមទាំងខុនដូ និងទីតាំងដែលមានមនុស្សច្រើន នៅក្នុងតំបន់ដែលមានអត្រាឆ្លងខ្ពស់ ។

យោងតាមរបាយការណ៍របស់កាសែត Bangkok Post បានឲ្យដឹងថា ក្នុងចំណោមមនុស្ស ១៤១,៥១៦ នាក់ដែលត្រូវបានធ្វើតេស្ត ដោយប្រើឧបករណ៍តេស្តអង់ទីគ័រ រកឃើញអ្នកឆ្លង ១៥,៥៨៨ នាក់ ប៉ុន្តែចំនួននេះធ្លាក់ចុះមកត្រឹម ១៥,០៧៤ នាក់ នៅពេលប្រើតេស្ត PCR ។

ទន្ទឹមនោះ ៦៩ ភាគរយនៃអ្នកដែលធ្វើតេស្តវិជ្ជមានមិនបញ្ចេញរោគសញ្ញា ឬបង្ហាញរោគសញ្ញាតិចតួចប៉ុណ្ណោះ ខណៈ ៤,៤២៧ នាក់មានរោគសញ្ញាកម្រិតមធ្យម ខណៈអ្នកជំងឺ ៣២៣ នាក់មានរោគសញ្ញាធ្ងន់ធ្ងរ ។

លោក Yongyot ជឿជាក់ថា ប្រសិនបើការធ្វើតេស្តទ្រង់ទ្រាយធំ និងការធ្វើចត្តាឡីស័ក អាចបន្តនៅក្នុងរដ្ឋធានីក្នុងរយៈពេល ២ សប្តាហ៍ខាងមុខនេះ ខ្សែកោងកូវីដ ១៩ អាចចាប់ផ្តើមរាបស្មើ ។ អ្នកជំងឺនឹងត្រូវយកទៅព្យាបាល និងនៅដាក់ដាច់ដោយឡែកពីអ្នកដទៃ ហើយវានឹងកាត់បន្ថយការរីករាលដាលនៃការឆ្លង និងការស្លាប់ដែលអាចកើតមាន ។

គួរបញ្ជាក់ថា គិតត្រឹមពេលនេះ ប្រទេសថៃបានកត់ត្រាករណីឆ្លងជំងឺកូវីដ ១៩ សរុប ៨៣៩,៧៧១ ករណី និងមានអ្នកស្លាប់ចំនួន ៦,៩៤២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger