គ្មានផ្លូវគេចបានទេ! តាលីបង់ ចូលដល់ កាប៊ុល ស្រីៗប្រឈមស្ថានភាពកាន់តែអាក្រក់

សមាជិកសភាអាហ្វហ្គានីស្ថាននៅទីក្រុងកាប៊ុល នាង Farzana Kochai បានប្រាប់ BBC ពីរបៀបដែលមនុស្សអស់សង្ឃឹម កំពុងព្យាយាមយ៉ាងខ្លាំងដើម្បីភៀសខ្លួនចេញពីរដ្ឋធានី។

នាងនិយាយថា ពួកគេមិនអាចទៅណាបានទេ គ្មានកន្លែងណានៅសល់ឡើយ។ យន្តហោះអាចនឹងពេញ ហើយមិនមានជើងហោះហើរចេញពីទីក្រុងកាប៊ុល ទៅប្រទេសឥណ្ឌាឬ ប្រទេសជិតខាងផ្សេងទៀតនោះទេ។

ពួកគេនិយាយថា ជើងហោះហើរបានពេញ ហើយយើងជាប់នៅទីនេះ ពួកគេគ្មានជម្រើសទេ ពួកគេត្រូវស្នាក់នៅទីនេះ។ ស្ត្រីនៅតំបន់ផ្សេងទៀតនៃប្រទេស ដែលជាកន្លែងក្រុមតាលីបង់គ្រប់គ្រងរួចទៅហើយបានប្រាប់នាងថា ពួកគេលែងទៅធ្វើការឬទៅសាលារៀនហើយ។

សម្រាប់ស្ត្រី ស្ថានភាពកាន់តែអាក្រក់ជាងការរំពឹងទុកទៅទៀត។ ស្ត្រីនឹងត្រូវឃុំឃាំងនៅក្នុងផ្ទះរបស់ពួកគេ តើនោះនឹងមានអ្វីកើតឡើង តើវានឹងទៅជាយ៉ាងណា?។

ក្រសួងមហាផ្ទៃអាហ្វហ្គានីស្ថានបានឲ្យដឹងនៅថ្ងៃអាទិត្យនេះថា ក្រុមតាលីបង់បានចូលមកតាមគ្រប់ច្រក ដល់រដ្ឋធានីកាប៊ុលហើយ។

យ៉ាងណាក្តី ក្រុមតាលីបង់បាននិយាយថា ខ្លួនគ្មានផែនការដណ្តើមយករដ្ឋធានីអាហ្វហ្គានីស្ថានដោយប្រើកម្លាំងឡើយ។ ក្រុមប្រដាប់អាវុធ បានចេញសេចក្តីថ្លែងការណ៍នេះ ខណៈយុទ្ធជនរបស់ពួកគេ កំពុងស្ថិតនៅជាយក្រុងកាប៊ុល។

សេចក្តីថ្លែងការណ៍បន្តថា “ការចរចាកំពុងធ្វើឡើង ដើម្បីធានាថា ដំណើរការផ្ទេរអំណាច នឹងសម្រេចប្រកបដោយសុវត្ថិភាពនិងសន្តិសុខ ដោយមិនធ្វើឲ្យប៉ះពាល់ដល់អាយុជីវិត ទ្រព្យសម្បត្តិនិងកិត្តិយសរបស់នរណាម្នាក់ ហើយមិនធ្វើឲ្យប៉ះពាល់ដល់អាយុជីវិតរបស់អ្នកក្រុងកាប៊ុលឡើយ”៕

ប្រែសម្រួល៖ Vann Vann

ប្រភព៖ BBC

ចុចអាន៖ Breaking News! ក្រុមតាលីបង់ ចូលដល់ទីក្រុង កាប៊ុល ហើយ