រៀបចំ​មណ្ឌល​ចត្តាឡីស័ក អ្នក​ពាក់ព័ន្ធ​កូវីដ​ នៅ​ក្រសួង​សាធារណការ​

ភ្នំពេញ៖ ក្រសួងសាធារណការ និងដឹកជញ្ជូន បានរៀបចំមណ្ឌលសម្រាប់​ធ្វើ​ចត្តាឡីស័ក ស្ថិតនៅបរិវេណទីស្ដីការក្រសួងសម្រាប់ដាក់បុគ្គលិកមន្ត្រីរាជការ និងបុគ្គលិកជាប់កិច្ចសន្យា ដែល​ជាប់ពាក់ព័ន្ធនឹងអ្នកជំងឺ​កូវីដ​១៩​ធ្វើចត្តាឡីស័ក។

យោងតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូន នៅថ្ងៃទី១៩ ខែសីហានេះ ដើម្បីចូលរួមជាមួយរាជរដ្ឋាភិបាល ក្នុងការបង្ការទប់ស្កាត់ការរីករាលដាលជំងឺកូវីដ-១៩ ក្រសួងបានរៀបចំមណ្ឌល​ចត្តាឡីស័ក ស្ថិតនៅបរិវេណទីស្ដីការក្រសួង សម្រាប់មន្រ្តីនិងបុគ្គលិកដែលមានការជាប់ពាក់ព័ន្ធជាមួយអ្នកវិជ្ជមានកូវីដ១៩ ជាយថាហេតុណាមួយ ហើយពុំមានលទ្ធភាពគ្រប់គ្រាន់ និងទីកន្លែងសមរម្យសម្រាប់ការធ្វើចត្តាឡីស័ក នៅតាមគេហដ្ឋានដែលខ្លួនកំពុងរស់នៅ។

មណ្ឌលចត្តាឡីស័កនេះរៀបចំឡើងត្រឹមត្រូវតាមគោលការណ៍ណែនាំរបស់ក្រសួងសុខាភិបាល ដែលមានបំពាក់គ្រែស្នាក់នៅចំនួន៥០ មានបណ្ដាញទឹកស្អាត អគ្គិសនី មានបន្ទប់អនាម័យសមរម្យ និងការផ្ដល់ជូនអាហារ ៣ ពេល (ព្រឹក-ថ្ងៃ-ល្ងាច) ព្រមទាំងផ្ដល់ជូនការធ្វើតេស្តរហ័ស(Rapid Test) ដល់អ្នកធ្វើ​ចត្តាឡីស័ក តាមពេលវេលាដែលកំណត់ទៀងទាត់ផងដែរ៕

អត្ថបទ៖ សំអឿន