ចិន ឲ្យបន្តកិច្ចប្រឹងប្រែងប្រយុទ្ធប្រឆាំងភេរវកម្មនៅ អាហ្វហ្គានីស្ថាន កុំឲ្យប្រទេសនេះក្លាយជាឋានសួគ៌របស់ភេរវករម្តងទៀត

បេសកជនកំពូលមួយរូបរបស់ចិនប្រចាំអង្គការសហប្រជាជាតិ (UN) កាលពីថ្ងៃព្រហស្បតិ៍បានអំពាវនាវឲ្យបន្តកិច្ចខិតខំប្រឹងប្រែង ប្រយុទ្ធប្រឆាំងនឹងអំពើភេរវកម្មនៅអាហ្វហ្គានីស្ថាន ដើម្បីការពារកុំឲ្យប្រទេសនេះក្លាយជាឋានសួគ៌របស់ភេរវករម្តងទៀត ។

លោក Dai Bing អ្នកទទួលបន្ទុកកិច្ចការនៅបេសកកម្មអចិន្ត្រៃយ៍ចិនប្រចាំ UN បានប្រាប់ក្រុមប្រឹក្សាសន្តិសុខ ក្នុងកិច្ចប្រជុំមួយនៅទីក្រុងញូវយ៉កថា អស់រយៈពេល ២០ ឆ្នាំហើយ ចាប់តាំងពីសង្គ្រាមភេរវកម្មនៅអាហ្វហ្គានីស្ថានបានចាប់ផ្តើម ការគំរាមកំហែងភេរវកម្មមិនត្រូវបានលុបចោលនោះទេ ។

លោកបាននិយាយថា ផ្ទុយទៅវិញចំនួនអង្គការភេរវករនៅក្នុងប្រទេសអាហ្វហ្គានីស្ថាន បានកើនឡើងពីចំនួនតែមួយខ្ទង់រហូតដល់ជាង ២០ អង្គការ ដោយមានភេរវករបរទេសជិត ១ ម៉ឺននាក់នៅក្នុងប្រទេស ។

លោក Dai បានបញ្ជាក់ថា ក្រុមត្រួតពិនិត្យរបស់ក្រុមប្រឹក្សាសន្តិសុខ បានចេញរបាយការណ៍ម្តងហើយម្តងទៀតនៅឆ្នាំនេះ ដោយចង្អុលបង្ហាញថា អង្គការភេរវករដូចជា ISIS អាល់កៃដា ចលនាឥស្លាម East Turkestan និងតាលីបង់ប៉ាគីស្ថាន បានកើនឡើង និងប្រមូលផ្តុំគ្នានៅអាហ្វហ្គានីស្ថាន ។

លោកបានព្រមានថា ស្ថានភាពបច្ចុប្បន្ននៅអាហ្វហ្គានីស្ថាន មានការផ្លាស់ប្តូរទ្រង់ទ្រាយធំ ហើយអង្គការភេរវករទំនងជាទាញយកផលប្រយោជន៍ពីភាពវឹកវរនេះ ។

លោកសង្កត់ធ្ងន់ថា “អាហ្វហ្គានីស្ថានមិនត្រូវក្លាយជាឋានសួគ៌របស់ភេរវករម្តងទៀតទេ យើងសង្ឃឹមថា តាលីបង់នឹងផ្តាច់ទំនាក់ទំនងជាមួយអង្គការភេរវករទាំងអស់” ។

ជាចុងក្រោយលោក Dai បាននិយាយថា ប្រទេសទាំងអស់គួរតែសហការគ្នា ក្នុងការប្រយុទ្ធប្រឆាំងភេរវកម្មគ្រប់ប្រភេទ ស្របតាមច្បាប់អន្តរជាតិ និងសេចក្តីសម្រេចរបស់ក្រុមប្រឹក្សាសន្តិសុខ ហើយនាំមកនូវក្តីសង្ឃឹមនៃសន្តិភាពដល់អាហ្វហ្គានីស្ថាន ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ WHO ថា វ៉ាក់សាំងរបស់ ចិន ៣ លានដូសនឹងផ្ដល់ទៅប្រទេសដែលគ្មានឆ្លងកូវីដសូម្បីមួយករណី