លំនៅឋាន៥ខ្នង ត្រូវអគ្គិភ័យឆាបឆេះបំផ្លាញគ្មានសល់ នៅសង្កាត់ទួលសង្កែទី១

រាជធានីភ្នំពេញ៖ លំនៅឋានរបស់ពលរដ្ឋចំនួន៥ខ្នងផ្ទះ ភាគច្រើនសង់ឡើងពីឈើប្រក់សង្ក័សី ត្រូវបានគ្រោះអគ្គិភ័យឆាបឆេះបំផ្លាញអស់គ្មានសល់ កាលពីវេលាម៉ោង១៩ និង៣០នាទី យប់ថ្ងៃទី២៣ ខែសីហា ឆ្នាំ២០២១ នៅចំណុចតាមបណ្តោយផ្លូវរថភ្លើង ក្នុងក្រុម៣ ភូមិទួលសង្កែ សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ។

យោងតាមប្រភពព័ត៌មានឱ្យដឹងថា នៅមុនកើតហេតុ ពលរដ្ឋម្នាក់ដែលជាអ្នកជួលផ្ទះគេ ក្នុងចំណោមផ្ទះ៥ខ្នងដែលឆាបឆេះ បានដុតខ្សែភ្លើងដើម្បីយកស្ពាន់យកទៅលក់។ ពេលនោះ ដោយមិនការធ្វេសប្រហែសមិនប្រយ័ត្ន បង្កឱ្យមានការជាអណ្តាតភ្លើង ឆាបឆេះផ្ទះជួលរបស់ខ្លួន រួចក៏បន្តឆេះរាលដាលជាបន្តបន្ទាប់ កើតមានជាអណ្តាតភ្លើងឆេះយ៉ាងសន្ធោរសន្ធៅខ្លាំងឡើងតែម្តង។

ភ្លាមៗនោះ កម្លាំងអាជ្ញាធរមូលដ្ឋាន រួមជាមួយនគរបាលជំនាញ និងរថយន្តពន្លត់អគ្គីភ័យជាច្រើនគ្រឿង បានចុះអន្តរាគមន៍ ដល់ទីតាំងកើតហេតុ ដើម្បីធ្វើការបាញ់ទឹកទប់ស្កាត់អណ្តាតភ្លើង។ ក្រោយការខិតខំអន្តរាគមន៍បាញ់ទឹកអស់រយៈពេលប្រមាណ១ម៉ោងរួចមក អណ្តាតភ្លើងក៏ត្រូវបានរលត់ទៅវិញ១០០ភាគរយ ដោយបានបំផ្លាញលំនៅឋានអស់សរុប០៥ខ្នងផ្ទះ ដែលនៅជាប់ៗគ្នា។

ក្នុងករណីខាងលើនេះ សមត្ថកិច្ចជំនាញ បានប្រើប្រាស់រថយន្តពន្លត់អគ្គីភ័យអស់សរុប ១៥គ្រឿង ទើបអាចគ្រប់គ្រងស្ថានការណ៍បានទាំងស្រុង។ ក្នុងករណីនោះ ពុំមានបណ្តាលឱ្យមនុស្សណាម្នាក់រងរបួស ឬស្លាប់ឡើយ៕

អត្ថបទ៖ លីហេង