វៀតណាម ដាក់ពង្រាយកងទ័ពពង្រឹងការបិទខ្ទប់ទីក្រុងហូជីមិញ មិនឲ្យប្រជាជនចេញពីផ្ទះសូម្បីតែទិញម្ហូប

ប្រទេសវៀតណាមបានដាក់ពង្រាយទាហាននៅតាមដងផ្លូវក្នុងទីក្រុងហូជីមិញកាលពីថ្ងៃចន្ទ ដើម្បីជួយអនុវត្តការបិទខ្ទប់យ៉ាងតឹងរ៉ឹងនៅក្នុងតំបន់ទីក្រុងធំបំផុតរបស់ប្រទេស និងជាចំណុចកណ្តាលនៃការផ្ទុះឡើងជំងឺកូវីដ ១៩ ដ៏អាក្រក់បំផុតរបស់ខ្លួនរហូតមកដល់បច្ចុប្បន្ននេះ ។

ប្រទេសវៀតណាមបានអនុវត្តការរឹតត្បិតការធ្វើដំណើរនៅទីក្រុងហូជីមិញនៅដើមខែកក្កដា ប៉ុន្តែបានប្រកាសពីការទប់ស្កាត់ដ៏តឹងរ៉ឹងបំផុតរបស់ខ្លួននៅសប្តាហ៍មុន ខណៈករណីឆ្លងបានបន្តកើនឡើង ។ អាជ្ញាធរបាននិយាយថា ការអនុវត្តវិធានការទប់ស្កាត់ថ្មីៗនេះមិនមានភាពតឹងរ៉ឹងគ្រប់គ្រាន់នៅឡើយទេ ។

រដ្ឋាភិបាលបាននិយាយថា ការរឹតបន្តឹងបានចាប់ផ្តើមកាលពីថ្ងៃចន្ទ ដោយហាមឃាត់ប្រជាជនមិនឲ្យចាកចេញពីផ្ទះរបស់ពួកគេ សូម្បីតែទិញម្ហូបអាហារ ហើយបាននិយាយថា យោធានឹងចូលជួយក្នុងការអនុវត្តនោះ ។

កន្លងមក សេចក្តីប្រកាសនេះត្រូវបានធ្វើវិសោធនកម្មរួចហើយ ពោលឲ្យប្រជាជននៅតំបន់ខ្លះនៅតែអាចទិញម្ហូបបាន ប៉ុន្តែក្រោយមកត្រូវបានប្តូរទៅជាការហាមឃាត់ទាំងស្រុងវិញ ដោយបង្កឲ្យមានការភ័ន្តច្រឡំ និងការភ័យស្លន់ស្លោក្នុងការទិញទំនិញនៅផ្សារទំនើបនានា ក្នុងទីក្រុងកាលពីចុងសប្តាហ៍ ។

ទន្ទឹមនោះអ្នកនៅកន្លែងបិទខ្ទប់នោះបាននិយាយកាលពីថ្ងៃចន្ទថា ទាហានកំពុងផ្តល់អាហារដល់ប្រជាជននៅទីក្រុងកាលពីថ្ងៃចន្ទ ហើយរូបភាពដែលត្រូវបានផ្សព្វផ្សាយដោយប្រព័ន្ធផ្សព្វផ្សាយរដ្ឋបានបង្ហាញពីទាហានប្រដាប់អាវុធ កំពុងត្រួតពិនិត្យប៉ុស្តិ៍ និងត្រួតពិនិត្យឯកសារ ។

បើយោងតាមក្រសួងសុខាភិបាលបានឲ្យដឹងថា ទីក្រុងហូជីមិញបានកត់ត្រាករណីឆ្លងជំងឺកូវីដ ១៩ សរុបចំនួន ១៧៦,០០០ ករណី និងអ្នកស្លាប់ចំនួន ៦,៦៧០ នាក់ ពោលស្មើនឹងពាក់កណ្តាលនៃករណីឆ្លងសរុបរបស់វៀតណាម និង ៨០ ភាគរយនៃអ្នកស្លាប់សរុប ។

ចំណែកប្រជាជននៅសង្កាត់ Phu Nhuan និង Go Vap របស់ទីក្រុងហូជីមិញបានប្រាប់ Reuters ថា ពួកគេបានទទួលអង្ករ សាច់ ត្រី និងបន្លែពីយោធា បន្ទាប់ពីរដ្ឋាភិបាលបានប្រកាសកាលពីថ្ងៃសុក្រថា ខ្លួននឹងបញ្ជូនអង្ករចំនួន ១៣ ម៉ឺនតោន ពីឃ្លាំងស្តុកទុករបស់រដ្ឋទៅកាន់ទីក្រុងហូជីមិញ រួមជាមួយទីក្រុង និងខេត្តចំនួន ២៣ ផ្សេងទៀតផងដែរ ។

បន្ទាប់ពីគ្រប់គ្រង និងទប់ទល់ជំងឺកូវីដ ១៩ បានយ៉ាងជោគជ័យកាលពីឆ្នាំមុន គិតត្រឹមពេនេះ វៀតណាមបានកត់ត្រាករណីឆ្លងជាង ៣៥៨,០០០ នាក់ និងមានអ្នកស្លាប់ជាង ៨,៦០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ វៀតណាម អនុញ្ញាតឲ្យប្រើឱសថបុរាណមួយប្រភេទព្យាបាលកូវីដ