សម្លាប់មាន់ បង្ហូរទឹកសំអុយចូលមាត់អូរ អង្គភាពរដ្ឋាករទឹកចេញ​ប្រតិកម្ម

ខេត្តបាត់ដំបង៖ ឯកឧត្តម អ៊ុត ក្លឹង ទីប្រឹក្សាផ្ទាល់សម្តេច ស ខេង និងជាប្រធានអង្គភាពរដ្ឋាករទឹក បាត់ដំបង បានចេញ​ប្រតិកម្មទៅនឹងទីតាំងសម្លាប់មាន់មួយកន្លែង ដែលលោកបានរាយការណ៍ទៅអាជ្ញាធរ និងអង្គភាពពាក់ព័ន្ធ រយ:ពេលជាងកន្លះឆ្នាំហើយ ដើម្បីអោយផ្លាស់ប្តូរទីតាំង ឬកែប្រែឡើងវិញប៉ុន្តែទីបំផុតនៅតែដដែល​។

ទីតាំងសម្លាប់មាន់នេះ មានទីតាំងនៅជាប់នឹងមាត់អូរ ជាប់នឹងផ្លូវជាតិលេខ៥៧ (ខាងលិចស្ពានវត្តគរ​ប្រហែល ១០០ ម៉ែត្រ) ស្ថិតក្នុងភូមិវត្តគរ សង្កាត់វត្តគរ ក្រុងបាត់ដំបង ដោយរាល់ការសម្លាប់មាន់ និងសម្អាតមាន់ តែងតែបង្ហូរទឹកសំអុយនេះចូលទៅក្នុងអូរ ដែលជាប្រភពទឹកហូរធ្លាក់ចូលទៅក្នុងស្ទឹងសង្កែ ហើយសូម្បី​តែ​អ្នកធ្វើដំណើរកាត់ពីមុខទីតាំងនេះ ក៏ស្ទើរតែទ្រាំនិងក្លិនស្អុយសឹងមិនបាន។

ដោយឡែកស្ថានីយ៍របស់អង្គភាពរដ្ឋាករទឹកបាត់ដំបង ដែលក្រុមហ៊ុនជប៉ុនបានមកសាងសង់នៅចំពីមុខវត្តកណ្តឹង ទាញយកទឹកបានស្អាតដើម្បីយកទៅផលិត ព្រោះទីតាំងនេះស្ថិតនៅប៉ែកខាងលើនៃក្រុងបាត់ដំបង ប៉ុន្តែផ្ទុយទៅវិញអូរដែលគេបង្ហូរទឹកស្អុយពីកាកសំណល់មាន់ គឺវានៅពីលើស្ថានីយ៍ប្រមាណ ២០០ ម៉ែត្រ ប៉ុណ្ណោះ។

ឯកឧត្តម អ៊ុត ក្លឹង បានបញ្ជាក់ថា កន្លងមកលោកបានរាយការណ៍រឿងនេះទៅអោយអាជ្ញាធរ និងអង្គភាពពាក់ព័ន្ធរួចមកហើយ ដើម្បីអោយទីតាំងនេះកែប្រែឡើងវិញ ឬក៏ផ្លាស់ប្តូរទីតាំង ក្នុងការបញ្ឈប់កុំអោយមានការបង្ហូរទឹកស្អុយចូលក្នុងស្ទឹងសង្កែតទៅទៀត ព្រោះវាបានប៉ះពាល់យ៉ាងធ្ងន់ធ្ងរទៅលើការផលិតទឹកស្អាតរបស់អង្គភាព ប៉ុន្តែបើគិតមកទល់នឹងពេលនេះ គឺមានរយ:ពេលជាងកន្លះឆ្នាំហើយ ដែលទីតាំងនេះគ្មានការកែប្រែសោះ បើយ៉ាងដូច្នេះមែន វាអាចប៉ះពាល់ដល់សុខភាពប្រជាពលរដ្ឋដែលកំពុងប្រើប្រាស់ទឹកស្អាតខេត្តបាត់ដំបង៕

ក្រុមការងារ​ការងារកម្ពុជា​ថ្មី នឹង​ទាក់ទង​ទៅ​អាជ្ញាធរ​ខេត្ត​ទទួលខុសត្រូវ ដើម្បីបំភ្លឺ​បន្ថែមជុំវិញករណីនេះ៕

អត្ថបទ៖ សោ និយមរ័ត្ន