អាមេរិក ប្រឈមការវាយប្រហារបន្ថែមទៀត បន្ទាប់ពីការបំផ្ទុះគ្រាប់បែកនៅទីក្រុង កាប៊ុល

កងទ័ពអាមេរិកដែលកំពុងជួយជម្លៀសជនជាតិអាហ្វហ្គានីស្ថាន ដើម្បីគេចចេញពីការគ្រប់គ្រងរបស់ក្រុមតាលីបង់ កំពុងប្រឈមនឹងការវាយប្រហារបន្ថែមទៀតនៅថ្ងៃសុក្រនេះ ពោលគឺមួយថ្ងៃបន្ទាប់ពីក្រុមភេរវករសម្ព័ន្ធ ISIS បើកការបំផ្ទុះគ្រាប់បែកអត្តឃាតនៅខ្លោងទ្វារ អាកាសយានដ្ឋានក្រុងកាប៊ុល ដែលមានមនុស្សកកកុញដោយបានសម្លាប់ជនស៊ីវិលយ៉ាងតិច ៦០ នាក់និងកងទ័ពអាមេរិក ១៣ នាក់។

វីដេអូដែលថតដោយអ្នកកាសែតអាហ្វហ្គានីស្ថាន បានបង្ហាញពីសាកសពរាប់សិបនាក់ នៅរាយប៉ាយជុំវិញប្រឡាយមួយ នៅជាយព្រលានយន្តហោះ។ សាក្សីបាននិយាយថា មានការផ្ទុះច្រើនលើកនិងការបាញ់កាំភ្លើងនៅទីនោះ។

សម្ព័ន្ធក្រុមរដ្ឋឥស្លាម ISKP (ISIS-K) ក្នុងប្រទេសអាហ្វហ្គានីស្ថាន បាននិយាយថា អ្នកបំផ្ទុះគ្រាប់បែកអត្តឃាតម្នាក់របស់ខ្លួន បានកំណត់គោលដៅលើអ្នកបកប្រែនិងអ្នកដែលសហការជាមួយកងទ័ពអាមេរិក។

ប្រធានាធិបតីអាមេរិកលោក Joe Biden បានសន្យាសងសឹកចំពោះការវាយប្រហារនៅទីក្រុងកាប៊ុល។ លោកនិយាយថា “យើងនឹងតាមរកអ្នកហើយឲ្យអ្នកសងវិញ ចំពោះអ្វីដែលអ្នកបានធ្វើ។ ខ្ញុំនឹងការពារផលប្រយោជន៍របស់យើង ចំពោះប្រជាជនរបស់យើងដោយគ្រប់វិធានការតាមបញ្ជារបស់ខ្ញុំ”។

កងទ័ពអាមេរិកចំនួន ១៣ នាក់ដែលស្លាប់នៅក្នុងការវាយប្រហារកាលពីថ្ងៃព្រហស្បតិ៍ គឺជាការបាត់បង់ដ៏អាក្រក់បំផុតក្នុងរយៈពេលត្រឹមមួយថ្ងៃ សម្រាប់កងទ័ពអាមេរិកនៅអាហ្វហ្គានីស្ថានចាប់តាំងពីការវាយប្រហារខែសីហាឆ្នាំ ២០១១ ទៅលើឧទ្ធម្ភាគចក្រ Chinook ដែលបានសម្លាប់យោធាចំនួន ៣០ នាក់។

លោកឧត្តមសេនីយ៍ Frank McKenzie ប្រធានបញ្ជាការកណ្តាលអាមេរិកបាននិយាយថា មេបញ្ជាការអាមេរិកកំពុងប្រុងជើងការខ្ពស់ ចំពោះការវាយប្រហារដែលអាចកើតមានឡើងបន្ថែមទៀត។

លោកនិយាយថា “យើងកំពុងធ្វើអ្វីគ្រប់យ៉ាងដែលយើងអាចធ្វើបាន ដើម្បីត្រៀមខ្លួន”៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ មកស្គាល់ឲ្យច្បាស់ពីក្រុមដែលបំផ្ទុះគ្រាប់បែកអត្តឃាត នៅព្រលានយន្តហោះទីក្រុង កាប៊ុល តើពួកគេជានរណា?