ទ័ពព្រំដែន ប៉ាគីស្ថាន បាញ់សម្លាប់ពលរដ្ឋ អាហ្វហ្គានីស្ថាន ដែលព្យាយាមរត់គេចចេញពីប្រទេស

ប្រភពពីក្រុមតាលីបង់បាននិយាយថា កងកម្លាំងប៉ាគីស្ថានបានបើកការបាញ់ប្រហារទៅលើជនជាតិអាហ្វហ្គានីស្ថានមួយក្រុម ដែលប៉ុនប៉ងឆ្លងដែនខុសច្បាប់នៅជិតប៉ុស្តិ៍ត្រួតពិនិត្យ Tokham ភាគពាយព្យនៃប្រទេសប៉ាគីស្ថាន ។

យោងតាមប្រភពនោះបានឲ្យដឹងថា ទាហានប៉ាគីស្ថានបានបើកការបាញ់ប្រហារ ដោយបណ្ដាលឲ្យជនជាតិអាហ្វហ្គានីស្ថាន ៣ នាក់បានស្លាប់ និង ៥ នាក់ទៀតរងរបួស បន្ទាប់ពីជនជាតិអាហ្វហ្គានីស្ថាន ១០ នាក់ បានឆ្លងកាត់ព្រំដែនតាមផ្លូវកខ្វក់មួយនៅជិតប៉ុស្តិ៍ត្រួតពិនិត្យ ។

ប្រភពបានបន្ថែមថា សាកសពរបស់ជនជាតិអាហ្វហ្គានីស្ថានដែលត្រូវបានសម្លាប់ នៅតែដេកស្ដូងស្ដឹងនៅក្បែរប៉ុស្តិ៍ត្រួតពិនិត្យនោះ ។

បើយោងតាមប្រភពនៅក្នុងក្រសួងការបរទេសប៉ាគីស្ថានបានឲ្យដឹងថា កន្លងមកសហរដ្ឋអាមេរិក និងអង្គការណាតូក៏បានស្នើឲ្យប៉ាគីស្ថាន ជួយសម្រួលដល់ការជម្លៀសពលរដ្ឋបរទេសចេញពីទីក្រុងកាប៊ុលផងដែរ ។

បន្ទាប់ពីការវាយលុករយៈពេលមួយសប្តាហ៍បានចាប់ផ្តើម ក្រោយអាមេរិកបានចាប់ផ្តើមដកកងកម្លាំងចេញពីអាហ្វហ្គានីស្ថាន ក្រុមតាលីបង់បានចូលទីក្រុងកាប៊ុលនៅថ្ងៃទី ១៥ ខែសីហា ហើយបណ្តាលឲ្យរដ្ឋាភិបាលស៊ីវិលដួលរលំ ។

ពាក់ព័ន្ធករណីនេះបានជំរុញឲ្យអ្នកស្រុករាប់ពាន់នាក់ស្វែងរកការរត់គេចចេញ ព្រោះខ្លាចមានការសងសឹកពីពួកសកម្មប្រយុទ្ធ ខណៈប្រទេសជាច្រើនបានចាប់ផ្តើមជម្លៀសបេសកកម្មការទូត និងពលរដ្ឋរបស់ខ្លួនចេញពីប្រទេសអាស៊ីកណ្តាលមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ការ​ស្លាប់​កើន​ដល់ជាង​ ១៧០​ នាក់​ពី​ការ​វាយ​ប្រហារ​នៅ​កាប៊ុល