ដូនចាស៣រូបអាយុដល់១០៦ឆ្នាំ ទទួលការឧបត្ថម្ភ ខណៈអភិបាលខេត្តកំពង់ឆ្នាំងចុះពិនិត្យការចាក់វ៉ាក់សាំង

លោក ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង បានឧបត្ថម្ភទឹកប្រាក់ជូនដូនចាស់៣រូប ក្នុងម្នាក់ៗទទួលបានប្រាក់ ៨០ម៉ឺនរៀល ខណៈលោកនិងក្រុមការងារ បានចុះធ្វើការពិនិត្យការចាក់វ៉ាក់សាំងជូនកុមារអាយុចាប់ពី ១២ឆ្នាំ ដល់ក្រោម ១៨ឆ្នាំ និងចាស់ជរា នៅវត្តអារញ្ញ សង្កាត់កំពង់ឆ្នាំង ក្រុងកំពង់ឆ្នាំង នៅថ្ងៃទី៣០ ខែសីហានេះ។

នៅក្នុងឱកាសនោះ លោក ស៊ិន សុវណ្ណារិទ្ធិ អភិបាលខេត្តកំពង់ឆ្នាំង បានជួបសំណេះសំណាលជាមួយ លោកយាយចាស់ៗ ៣នាក់ មាន១ លោកយាយ លឹម ស៊ុន អាយុ១០៤ ឆ្នាំ ២ លោកយាយ ស៊ិន សុទ្ធ អាយុ ៨៧ឆ្នាំ លោកយាយទាំង២រស់នៅភូមិទួលក្រឡាញ់ សង្កាត់កំពង់ឆ្នាំង និង ៣ លោកយាយ ហួរ គឹមសួរ អាយុ១០៦ឆ្នាំ រស់នៅក្នុងភូមិទី១ សង្កាត់ខ្សាម ក្រុងកំពង់ឆ្នាំង ដែលបានស្ម័គ្រចិត្តមកចាក់វ៉ាក់សាំងកូវីដ-១៩ តាមការអំពាវនាវរបស់អាជ្ញាធរ។

ជាមួយគ្នានេះដែរ លោកយាយទាំង០៣រូប បានសម្ដែងការអរគុណយ៉ាងជ្រាលជ្រៅចំពោះសម្តេចតេជោ ហ៊ុន សែន នាយករដ្ឋមន្ត្រី ដែលបានខិតខំស្វែងរកវ៉ាក់សាំងមកចាក់ជូនប្រជាពលរដ្ឋនៅក្នុងប្រទេសកម្ពុជាទាំងអស់ ដោយមិនគិតថ្លៃ។ នៅក្នុងការសំណេះសំណាលជាមួយលោកយាយទាំងបីនាក់ខាងលើនេះ លោកអភិបាលខេត្ត ក៏បានឧបត្ថម្ភថវិកាដល់លោកយាយទាំង ៣នាក់ ដោយក្នុងម្នាក់ៗទទួលបានថវិកាចំនួន ៨០ ម៉ឺនរៀល ជាការលើកទឹកចិត្តដល់លោកយាយ។

លោកអភិបាលខេត្តកំពង់ឆ្នាំង បានអំពាវនាវដល់ បងប្អូនប្រជាពលរដ្ឋទាំងអស់សូមអញ្ជើញមកចាក់វ៉ាក់សាំងបង្ការកូវីដ-១៩ បានគ្រប់ៗគ្នា និងនាំកូនចៅ អាយុចាប់ពី ១២ ឆ្នាំ ដល់ក្រោម១៨ឆ្នាំ មកចាក់វ៉ាក់សាំងនៅតាមទីតាំង មណ្ឌលសុខភាព តាមក្រុង ស្រុក ទាំងអស់ក្នុងខេត្តកំពង់ឆ្នាំង។ លោកបានផ្ដាំផ្ញើ បើទោះបានចាក់វ៉ាក់សាំងហើយក្តី ក៏ត្រូវតែអនុវត្តវិធានការ បីការពារ បីកុំ របស់រាជរដ្ឋាភិបាល និងគោរពតាមការណែនាំ របស់ក្រសួងសុខាភិបាលឱ្យបានខ្ជាប់ខ្ជួន ដើម្បីរួមគ្នាកាត់ ផ្ដាច់ការចម្លងជំងឺកូវីដ-១៩ ចូលក្មុងក្រុមគ្រួសារ សហគមន៍ និងប្រទេសជាតិ៕

អត្ថបទ៖ ឈៀងអារិទ្ធ