ព័ត៌មានអន្ដរជាតិ

ការវិវត្តសំខាន់ចុងក្រោយ៥យ៉ាងនៅអាហ្វហ្គានីស្ថាន

បានផុស

៣ years មុន

នៅ

ថ្ងៃអង្គារ ៣១ សីហា ២០២១

ដោយ

ប្រទេសអាហ្វហ្គានីស្ថានបានធ្លាក់ទៅកណ្តាប់ដៃរបស់តាលីបង់ទាំងស្រុងហើយ។ ពិភពលោកកំពុងតែទន្ទឹងរង់ចាំថា ស្ថានភាពនៅអាហ្វហ្គានីស្ថានយ៉ាងនៅពេលតាលីបង់ដឹកនាំជាថ្មី។ កម្លាំងយោធាអាមេរិក និងសម្ព័ន្ធមិត្តលោកខាងលិចខានដកចេញអស់ពីអាហ្វហ្គានីស្ថានត្រឹមថ្ងៃទី៣១ ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខាងក្រោមជាការវិវត្តសំខាន់ចុងក្រោយ៥យ៉ាង៖

ទី១៖ តាលីបង់អបអរជ័យជម្នះ

ក្រុមតាលីបង់បានបំផ្ទុះអាវុធទៅលើអាកាសដើម្បីអបអរសាទរជ័យជម្នះរបស់ខ្លួននៅពេលសហរដ្ឋអាមេរិកបានបញ្ចប់ការដកកម្លាំងយោធារបស់ខ្លួនអស់ចេញពីប្រទេសអាហ្វហ្គានីស្ថានតាមកាលបរិច្ឆេទថ្ងៃទី៣១ ខែសីហានេះ។

ទាំងព្រឹកព្រលឹមថ្ងៃអង្គារ៍នេះ តាលីបង់បានអបអរដោយបានបាញ់អាវុធទៅលើអាកាសស្ទើរទូទាំងរដ្ឋធានីកាប៊ុល។ អ្នកនាំពាក្យតាលីបង់លោក Zabihullah Mujahid បានប្រកាសថា ៖«វេលាម៉ោង១២យប់ កម្លាំងទ័ពអាមេរិកបានចាកចេញពីព្រលានយន្តហោះកាប៊ុលដែលជាពេលក្លាយដែលអាហ្វហ្គានីស្ថានត្រូវបានរំដោះ និងឯករាជ្យទាំងស្រុង»។

ទី២៖ ការបញ្ចប់វត្តមានយោធាអាមេរិក២០ឆ្នាំនៅតាលីបង់

លោកប្រធាធិបតីសហរដ្ឋអាមេរិក ចូ បៃដិន បានចេញសេចក្តីថ្លែងការណ៍បញ្ជាក់ពីការបញ្ចប់វត្តមានយោធាអាមេរិករយៈពេល២០ឆ្នាំនៅអាហ្វហ្គានីស្ថាន។

លោកលើកឡើងថា ៖«ឥឡូវនេះ វត្តមានយោធារយៈពេល២០ឆ្នាំរបស់យើងនៅអាហ្វហ្គានីស្ថានបានបញ្ចប់ហើយ។ រយៈពេល១៧ថ្ងៃចុងក្រោយនេះ កងទ័ពរបស់យើងបានធ្វើការហោះហើរធំបំផុតនៅក្នុងប្រវត្តិសាស្ត្រអាមេរិក ដោយជម្លៀសមនុស្សបានជាង ១២ម៉ឺននាក់ ទាំងពលរដ្ឋអាមេរិក ពលរដ្ឋសម្ព័ន្ធមិត្ត និងជនជាតិអាហ្វហ្គានីស្ថាន។ ការបញ្ចប់បេសកកម្មតាមផែនការគឺជាអនុសាសន៍ឯកច្ឆន្ទរបស់មេបញ្ជាការរួម និងមេបញ្ជាការទាំងអស់នៅសមរភូមិ»។

តាមការគ្រោងទុក លោក ចូ បៃដិន នឹងថ្លែងសុន្ទរកថាម្តងទៀតនៅរសៀលថ្ងៃអង្គារ៍ ទី៣១ ខែសីហានេះ។

ទី៣៖ ព្រលានយន្តហោះកាប៊ុល

ឥឡូវនេះ ព្រលានយន្តហោះកាប៊ុលលែងមានសេវាកម្មត្រួតពិនិត្យចរាចរណ៍ផ្លូវអាកាសទៀតហើយនៅពេលយោធាអាមេរិកត្រូវបានដកទាំងអស់ ហើយយន្តហោះស៊ីវិលអាមេរិកត្រូវបានហាមប្រតិបត្តិការនៅទូទាំងប្រទេស លុះត្រាតែមានការអនុញ្ញាតជាមុន។ នេះបើយោងតាមរដ្ឋបាលអាកាសចរណ៍សហព័ន្ធអាមេរិក (FAA)បាននិយាយ។

ទី៤៖ មហាអំណាចលោកខាងលិចបង្ខំទទួលយកការពិត

កម្លាំងមហាអំណាចលោកខាងលិចត្រូវបានបង្ខំឲ្យទទួលយកការពិតនៃការគ្រប់គ្រងរបស់តាលីបង់លើអាហ្វហ្គានីស្ថាន នៅពេលពួកគេដើរពីក្រោយតាមសេចក្តីសម្រេចរបស់អង្គការសហប្រជាជាតិដែលនិយាយថា ខ្លួនសង្ឃឹមថា តាលីបង់នឹងគោរពការប្តេជ្ញាចិត្តដើម្បីអនុញ្ញាតឲ្យជនជាតិអាហ្វហ្គានីស្ថានចាកចេញពីប្រទេស និងស្នើឲ្យបើកព្រលានយន្តហោះកាប៊ុលឡើងវិញដោយសុវត្ថិភាព ប៉ុន្តែខ្វះការទាមទារតំបន់សុវត្ថិភាពដែលគាំទ្រដោយអង្គការសហប្រជាជាតិនៅរដ្ឋធានីកាប៊ុល។

ទី៥៖ អ្នកស្លាប់ដោយការផ្ទុះគ្រាប់បែកអត្តឃាតប៉ុន្មានថ្ងៃចុងក្រោយនេះ

ប៉ុន្មានថ្ងៃចុងក្រោយនេះ ការបំផ្ទុះគ្រាប់បែកអត្តឃាតដែលវាយប្រហារលើមនុស្សនៅព្រលានយន្តហោះកាប៊ុលបានសម្លាប់មនុស្សជិត២០០នាក់ ក្នុងនោះសមាជិកយោធាអាមេរិក១៣នាក់ត្រូវបានសម្លាប់ដែរ ហើយមនុស្សរាប់រយនាក់បានរបួស៕

ប្រែសម្រួល៖ វីរបុត្រ
ប្រភព៖ BBC