បដិមាដំរី និមិត្តរូបនៃអាទិទេព ផ្ដល់នូវការការពារ និងកម្លាំងខ្លាំងក្លាចំពោះអាជីព

ដំរី ជាសត្វមួយប្រភេទត្រូវបានគេស្រឡាញ់ ហើយគោរពបូជា និងជានិមិត្តរូបរបស់អាទិទេពនៅក្នុងវប្បធម៌ជាច្រើន ព្រោះវាជាថនិកសត្វមានជីវិតធំជាងគេ។ ចំណែកក្នុងក្បួនហុងស៊ុយ ដំរីតំណាងឱ្យកម្លាំងខ្លាំងក្លា ការការពារ ប្រាជ្ញាមោះមុត និងសំណាងល្អគ្រប់ច្រកល្ហក។

ជំនឿលើសត្វនិងបដិមាដំរីមានដើមកំណើតនៅអាស៊ី និងអាហ្រ្វិក​យូរយារមកហើយ។ វាជាសត្វទេវកថាស័ក្តិសិទ្ធិដូចគ្នាទៅនឹងសត្វនាគដែរ។ ក្នុងសាសនាហិណ្ឌូ វាជាយានជំនិះរបស់អាទិទេព និងក៏ជាព្រះអាទិទេពមួយអង្គផងដែរ។

ក្នុងរឿងព្រេងហិណ្ឌូបានបង្ហាញពីអាទិទេពមួយអង្គដែលមានក្បាលដំរី និងខ្លួនមនុស្ស នោះគឺ ព្រះកិណេស (Ganesha)។

នៅសម័យបុរាណដំរីត្រូវបានបង្វឹកឱ្យធ្វើសង្គ្រាម ព្រោះវាមានកម្លាំងខ្លាំងដែលអាចកំចាត់ឧបសគ្គនានាងាយស្រួលជាងសត្វផ្សេង។ ហេតុនេះបើមានតាំងរូប ព្រះកិណេស នោះជានិមិត្តសញ្ញាតំណាងឱ្យសន្តិភាព ព្រោះទ្រង់ជាព្រះអាទិទេពដែលដកចេញនូវឧបសគ្គទាំងឡាយទាំងពួង។

ដំរីពណ៌ស

រូបបដិមាដំរីទាំងអស់មិនថាធំឬតូច សុទ្ធតែជានិមិត្តរូបនៃការការពារ សំណាងល្អ និងប្រាជ្ញាឈ្លាសវៃ។ ទោះយ៉ាងណាដំរីពណ៌សមានអត្ថន័យសំណាង ពិសេសជាងគេ។ វាត្រូវបានគេជឿថា ជាសត្វដ៏ពិសិដ្ឋ ព្រោះព្រះមាតារបស់ព្រះពុទ្ធ បានសុបិនអំពីដំរីសមួយក្បាល មុនពេលព្រះនាងសម្រាលបុត្រ។ ដូច្នេះទើបដំរីពណ៌សនៅក្នុងព្រះពុទ្ធសាសនា ត្រូវបានតំណាងឱ្យសេចក្តីថ្លៃថ្នូរ និងអំណាចខ្ពង់ខ្ពស់។

គេជឿថាតាំងដំរីនៅក្នុងផ្ទះ អាចហៅសំណាងល្អ និងផ្ដល់ភាពត្រជាក់ត្រជុំចូលគ្រួសារ។ បើតាំងនៅមុខផ្ទះ អាចហៅថាមពលវិជ្ជមាន បង្កើនអំណាចដល់ម្ចាស់។ បើតាំងនៅតុធ្វើការអាចការពារសំណាងអាក្រក់ និងបន្ថែមភាពរីកចម្រើននៅក្នុងអាជីព៕

ប្រែសម្រួល៖ សន្យា

ចុចអាន៖ តាំងរូបសត្វ ៥ ប្រភេទក្នុងផ្ទះឬការិយាល័យ អាចជួយការពារសំណាងអាក្រក់បាន

ចុចអាន៖ កូនត្រី និមិត្តរូបសំណាងបំផុត ត្រូវហុងស៊ុយជាមួយមនុស្សគ្រប់ធាតុ

ចុចអាន៖ សុបិនឃើញដំរី អត្ថន័យមានល្អនិងអាក្រក់មករួមគ្នា ជាពិសេសគឺលេខសំណាងប្រចាំជីវិត