ស្នងការខេត្តព្រះសីហនុ​ដាក់បទបញ្ជាតឹងរឹង​ដល់កម្លាំងនគរ​បាល​ទាំងអស់​ត្រៀមអន្តរាគមន៍សង្រ្គោះនៅលើផ្ទៃសមុទ្រ

លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានដាក់បទបញ្ជាយ៉ាងតឹងរឹង ដល់កម្លាំងនគរបាលទេចរណ៍ នគរបាលចរាចរផ្លូវទឹក និងកម្លាំងអធិការដ្ឋាននគរបាលក្រុងកោះរ៉ុង ត្រូវផ្សព្វផ្សាយ និងពង្រឹងគោលដៅផែដើមទី និងចុងទីលើប្រព័ន្ឋសុវត្ថិភាពជលយានយន្តទាំងអស់រួមទាំងតាមដានការប្រែប្រួលអាកាសធាតុ និងត្រៀមអន្តរាគមន៏សង្រ្គោះ ពេលមានហេតុការណ៏កើតឡើងជាយថាហេតុលើផ្ទៃសមុទ្រ។

ជាមួយគ្នានេះដែរលោកឧត្តមសេនីយ៍ទោស្នងការ បានឱ្យណែនាំភ្ញៀវទេសចរណ៍ជាតិ និងអន្តរជាតិដែលចុះលេងទឹកសមុទ្រនៅតាមឆ្នេរ ត្រូវមានការប្រុងប្រយ័ត្នឱ្យបានខ្ពស់ ព្រោះតាមសេចក្តីជូនដំណឹង របស់ក្រសួងធនធានទឹក និងឧតុនិយម ចាប់ពីថ្ងៃទី៦ដល់ថ្ងៃទី១១ ខែកញ្ញា ឆ្នាំ២០២១ រាជធានី-ខេត្ត ចំនួន៦ អាចប្រឈ មនឹងជំនន់ទឹកភ្លៀង ក្នុងនោះរួមមានខេត្តព្រះសីហនុផងដែរ។

លោកឧត្តមសេនីយ៍ទោស្នងការ ក៏បានអំពាវនាវដល់បងប្អូនប្រជាពលរដ្ឋ ភ្ញៀវជាតិ និងអន្តរជាតិ និងប្រជានេសាទ ទាំងអស់សូមយកចិត្តទុកដាក់ស្តាប់ការណែនាំពីមន្ត្រីជំនាញទាំងអស់ដើម្បីចៀសផុតពីឧបទ្ទវហេតុផ្សេងៗ៕

អត្ថបទៈ សំអឿន