ប្រយុទ្ធគ្នាទ្រង់ទ្រាយធំ ចលនាតស៊ូអាហ្វហ្គានីស្ថាន ចាប់បានយុទ្ធជនតាលីបង់ រាប់រយនាក់

ក្រុមតាលីបង់និងកងកម្លាំងប្រឆាំង នៅតែបន្តប្រយុទ្ធដើម្បីត្រួតត្រាជ្រលងភ្នំ Panjshir ភាគខាងជើងទីក្រុងកាប៊ុល ខណៈចលនាតស៊ូអាហ្វហ្គានីស្ថានបាននិយាយថា ពួកគេចាប់បានកងទ័ពតាលីបង់រាប់រយនាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រណសិរ្សតស៊ូជាតិ (NRF) អាហ្វហ្គានីស្ថាន ដែលប្រមូលផ្តុំកម្លាំងស្មោះត្រង់នឹងមេដឹកនាំក្នុងតំបន់លោក Ahmad Massoud បាននិយាយកាលពីថ្ងៃអាទិត្យថា ខ្លួនបានឡោមព័ទ្ធ “ភេរវកររាប់ពាន់នាក់” នៅច្រក Khawak ហើយពួកតាលីបង់ បានបោះបង់ចោលយានយន្តនិងឧបករណ៍នៅក្នុងតំបន់ Dashte Rewak។

អ្នកនាំពាក្យ NRF លោក Fahim Dashti បានបន្ថែមថា “ការប្រយុទ្ធទ្រង់ទ្រាយធំកំពុងបន្ត”។

លោក Charles Stratford អ្នកសារព័ត៌មានរបស់ទូរទស្សន៍ Al Jazeera ដែលមានមូលដ្ឋាននៅរដ្ឋធានីកាប៊ុល បានរាយការណ៍ថា យុទ្ធជនតាលីបង់រាប់រយនាក់ត្រូវបានចាប់ខ្លួនយកទៅឃុំឃាំងកាលពីថ្ងៃអាទិត្យ។

លោក Dashti បានសរសេរនៅលើបណ្តាញសង្គម Twitter ថា ស្រុក Paryan លែងមានយុទ្ធជនតាលីបង់ទៀតហើយ។ មកទល់ពេលនេះ យុទ្ធជនតាលីបង់ជិត ១,០០០នាក់ ត្រូវបានសម្លាប់ របួសឬត្រូវចាប់ជាឈ្លើយ បន្ទាប់ពីផ្លូវចេញចូលត្រូវបានបិទ។

ជាមួយគ្នានេះដែរ អ្នកនាំពាក្យក្រុមតាលីបង់ លោក Bilal Karimi បាននិយាយនៅលើបណ្តាញសង្គម Twitter កាលពីថ្ងៃអាទិត្យថា កងកម្លាំងរបស់ខ្លួន ដណ្តើមបានស្រុកចំនួន៥ ក្នុងចំណោមស្រុកទាំង ៧ របស់ខេត្តនេះ។

គួរបញ្ជាក់ថា Panjshir គឺជាខេត្តចុងក្រោយរបស់អាហ្វហ្គានីស្ថាន ដែលប្រឆាំងទប់ទល់នឹងក្រុមប្រដាប់អាវុធដែលបានឡើងកាន់អំណាចកាលពីខែមុន៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ប្រជាជនអាហ្វហ្គានីស្ថានដែលចង់ចេញពីប្រទេស មានសង្ឃឹមហើយ!