ព័ត៌មានអន្ដរជាតិ

UN អំពាវនាវរកជំនួញ៦០០លានដុល្លារបន្ទាន់ជួយពលរដ្ឋអាហ្វហ្គានីស្ថាន

បានផុស

៣ years មុន

នៅ

ថ្ងៃពុធ ៨ កញ្ញា ២០២១

ដោយ

ប្រទេសអាហ្វហ្គានីស្ថានកំពុងប្រឈមនឹងដួលរលំសេវាកម្មជាមូលដ្ឋាន ហើយស្បៀងអាហារ និងជំនួយផ្សេងៗទៀតជិតអស់ហើយ។ នេះបើតាមការិយាល័យអង្គការសហប្រជាជាតិសម្រាប់កិច្ចសហប្រតិបត្តិការនៃកិច្ចការមនុស្សធម៌ (OCHA) បាននិយាយនៅថ្ងៃអង្គារ៍ ទី៧ ខែកញ្ញា។

អ្នកនាំពាក្យ OCHA លោក Jens Laerke បានប្រាប់កិច្ចប្រជុំរបស់អង្គការសហប្រជាជាតិនៅទីក្រុងហ្សឺណែវថា ប្រជាជនអាហ្វហ្គានីស្ថានរាប់លាននាក់ត្រូវការជំនួយស្បៀងអាហារ និងជំនួយផ្នែកសុខភាព ដោយជំរុញឲ្យម្ចាស់ជំនួយផ្តល់ឲ្យបានច្រើនបន្ថែមទៀតមុនពេលសន្និសីទជំនួយអន្តរជាតិដើម្បីអាហ្វហ្គានីស្ថាននៅថ្ងៃទី១៣ ខែកញ្ញាខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារបានចេញសេចក្តីអំពាវនាវមួយបន្ទាន់ដើម្បីស្វែងរកថវិកាប្រមាណ៦០០លានដុល្លារអាមេរិកសម្រាប់បំពេញតម្រូវការមនុស្សធម៌ដល់ប្រជាជន១១លាននាក់ក្នុងរយៈពេលនៅសល់ឆ្នាំនេះជុំវិញវិបត្តិរាំងស្ងួត និងអត់ឃ្លាន។

អ្នកនាំពាក្យបាននិយាយថា ៖«សេវាកម្មជាមូលដ្ឋាននៅអាហ្វហ្គានីស្ថាននឹងដួលរលំ ហើយស្បៀងអាហារ និងជំនួយសង្គ្រោះជីវិតផ្សេងៗទៀតគឺជិតអស់ហើយ។ យើងជំរុញឲ្យម្ចាស់ជំនួយអន្តរជាតិឧបត្ថម្ភដល់ការអំពាវនាវនេះឲ្យបានឆាប់រហ័ស និងប្រកបដោយសប្បុរសធម៌»។

មនុស្សជាងកន្លះលាននាក់បានផ្លាស់ទីលំនៅក្នុងប្រទេសអាហ្វហ្គានីស្ថានក្នុងឆ្នាំនេះ ខណៈក្រុមតាលីបង់បានវាយលុកចូលទូទាំងប្រទេស និងដណ្តើមកាន់កាប់រដ្ឋធានីកាប៊ុលកាលពីថ្ងៃទី១៥ ខែសីហា៕

ប្រែសម្រួល៖ វីរបុត្រ
ប្រភព៖ Reuters

Related Topics:ប្រទេសអាហ្វហ្គានីស្ថាន