វ៉ាក់សាំងកូវីដ-១៩មិនបង្កហានិភ័យរលូតកូនចំពោះស្ត្រីមានគភ៌ឡើយ

ការសិក្សាថ្មីបំផុតចំនួនពីរ អះអាងថា វ៉ាក់សាំងការពារជំងឺកូវីដ-១៩ មិនបង្កើនហានិភ័យនៃការរលូតកូនចំពោះស្ត្រីមានផ្ទៃពោះនោះឡើយ។

លទ្ធផលនៃការសិក្សាមកពីមជ្ឈមណ្ឌលត្រួតពិនិត្យ និងបង្ការជំងឺឆ្លង (CDC) ដែលបានតាមដានសុវត្ថិភាពវ៉ាក់សាំងចំពោះស្រ្តីមានផ្ទៃពោះ បង្ហាញថា ស្ត្រីដែលប្រឈមនឹងការរលូតកូនមិនមែនមកពីការចាក់វ៉ាក់សាំងការពារជំងឺកូវីដ-១៩នោះទេ តែអាចមកពីពួកនាងមិនបានចាក់វ៉ាក់សាំងទៅវិញ។

ដោយឡែកការស្រាវជ្រាវជាច្រើនផ្សេងទៀត បានរកឃើញថា ម្តាយដែលមិនចាក់វ៉ាក់សាំងងាយប្រឈមមុខនឹងករណីជំងឺធ្ងន់ធ្ងរបណ្ដាលមកពីវីរុសកូវីដ-១៩ ឬមានភាគរយស្លាប់ខ្ពស់ជាងមនុស្សទូទៅ។

អ្នកស្រាវជ្រាវមកពីសាកលវិទ្យាល័យ កាលីហ្វញ៉ា បានតាមដានទៅលើស្ត្រីមានផ្ទៃពោះចំនួន ២៤៥៦នាក់ដែលទទួលវ៉ាក់សាំង Pfizer-BioNTech និងវ៉ាក់សាំង Moderna អំឡុងមានគភ៌ ២០សប្តាហ៍។ ពួកគេរកឃើញថា ហានិភ័យនៃការរលូតកូននៅក្នុងការសិក្សានេះគឺកើតឡើងដោយឯកឯង ហើយមានតែស្ត្រីចាក់វ៉ាក់សាំងរួចរាល់ពី ១១-១៦ ភាគរយប៉ុណ្ណោះ ដែលប្រឈមអត្រារលូតកូន។ ក្នុងនោះស្រ្តីវ័យចំណាស់ចាប់ពី ៤០ឆ្នាំឡើងទៅ ទើបប្រឈមខ្លាំង។

ចំណែក CDC បញ្ជាក់ការរកឃើញរបស់ខ្លួនថា វ៉ាក់សាំងបច្ចេកវិទ្យា mRNA មានសុវត្ថិភាពចំពោះស្ត្រីពពោះទាំងអស់។ ផ្អែកតាមការរកឃើញនេះ CDC ក៏បានជំរុញឱ្យស្ត្រីមានផ្ទៃពោះទៅទទួលវ៉ាក់សាំងបង្ការកូវីដ-១៩ ឱ្យបានឆាប់តាមដែលអាច ព្រោះវាមានសារៈសំខាន់ណាស់សម្រាប់អ្នកមានផ្ទៃពោះដើម្បីការពារខ្លួនពីការឆ្លងវីរុសកូវីដ-១៩ និងកាត់បន្ថយផលប៉ះពាល់ធ្ងន់ធ្ងរ ក៏ដូចជាបង្ការផលវិបាកចំពោះទារកពីកំណើត៕

ប្រែសម្រួល៖ សន្យា

ប្រភព៖ Daily Mail

ចុចអាន៖ ហេតុផល ៥យ៉ាង ស្ត្រីមានផ្ទៃពោះត្រូវចាក់វ៉ាក់សាំងការពារកូវីដ-១៩កុំខាន

ចុចអាន៖ ស្ត្រីមានផ្ទៃពោះដែលឆ្លងកូវីដមិនមានហានិភ័យខ្ពស់រលូតកូនឡើយ