អ្នកខេត្តបុរីរម្យ អរគុណ Lisa ដែលផ្សព្វផ្សាយប្រាសាទ ឲ្យពិភពលោកស្គាល់

ប្រជាពលរដ្ឋជាច្រើននាក់នៅក្នុងខេត្តបុរីរម្យ កាលពីថ្ងៃសៅរ៍ បានកោតសរសើរតារាចម្រៀងប៉ុប Lisa ដែលបានបង្ហាញប្រាសាទ ភ្នំរុង នៅក្នុងវីដេអូចម្រៀងចុងក្រោយរបស់នាងដែលមានចំណងជើងថា “Lalisa”។ នេះបើតាមការចុះផ្សាយរបស់កាសែតថៃ The Nation។

វីដេអូចម្រៀងថ្មីបំផុតរបស់ Lisa បានបញ្ចេញនៅលើបណ្តាញ YouTube របស់ក្រុមចម្រៀងស្រីកូរ៉េខាងត្បូង “Blackpink” កាលពីថ្ងៃសុក្រ។ វីដេអូនេះ មានអ្នកទស្សនាជាង ១០០ លាន View ក្នុងពេលត្រឹមមួយយប់។

ទន្ទឹមនឹងនេះដែរ ឈុតឆាកនានាដូចជាប្រាសាទថៃ ដែលបានដាក់បញ្ចូលទៅក្នុងវីដេអូចម្រៀងនេះ ត្រូវបានអ្នកប្រើប្រាស់បណ្តាញសង្គមកោតសរសើរ ហើយបានក្លាយជាប្រធានបទពិភាក្សាយ៉ាងក្តៅគគុក។

លោក Panuwat Ueasamarn ប្រធានឧទ្យានប្រវត្តិសាស្រ្ត ភ្នំរុង បាននិយាយថា លោកសូមអរគុណដល់ Lisa ដែលបានផ្សព្វផ្សាយប្រាសាទថ្មភ្នំរុង ដែលជាកន្លែងទាក់ទាញភ្ញៀវទេសចរនៅស្រុកកំណើតរបស់នាង ដល់ប្រជាជនទូទាំងពិភពលោក។

ចំណែក Benjalak Setsuwan អ្នកលក់នៅឯប្រាសាទថ្មភ្នំរុងបាននិយាយថា ចំនួនអ្នកទេសចរដែលមកទស្សនាទីតាំងនេះមានកម្រិតទាប​ ចាប់តាំងពីផ្ទុះវិបត្តិជំងឺកូវីដ-១៩។

លោកស្រីនិយាយថា “ខ្ញុំផ្ទាល់ជឿជាក់ថា ភ្ញៀវទេសចរកាន់តែច្រើននឹងមកទស្សនាកន្លែងនេះ នៅពេលការរឹតត្បិតកូវីដរបស់ខេត្ត ត្រូវបានបន្ធូរបន្ថយ”៕

ប្រែសម្រួល៖ Vann Vann

ប្រភព៖ The Nation

ចុចអាន៖ អ្នកគាំទ្រកម្ពុជាផ្ទុះការមិនពេញចិត្តឈុតមួយដូចប្រាសាទព្រះវិហារ ក្នុងបទចម្រៀងថ្មីរបស់ Lisa សមាជិកក្រុម Blackpink