កម្ពស់ទឹកទន្លេទាំងបីក្នុងខេត្តស្ទឹងត្រែងហក់ឡើងគួរឱ្យព្រួយបារម្ភ

យោងតាមរបាយការណ៍របស់ប្រធានមន្ទីរធនធានទឹក និងឧតុនិយមខេត្តស្ទឹងត្រែង ថ្ងៃទី ១៣ ខែកញ្ញាឆ្នាំ ២០២១នេះ បានឱ្យដឹងថា កម្ពស់ទន្លេទាំងបីក្នុងខេត្តស្ទឹងត្រែងមានការហក់ឡើង គួរឱ្យព្រួយបារម្ភ មានទន្លេខ្លះ ឡើងជិតមួយម៉ែត្រ និងទន្លេខ្លះឡើងដល់ជាង ៣ម៉ែត្រ។

លោក ប៉ាង ប៉េង ប្រធានមន្ទីរធនធានទឹក និងឧតុនិយមខេត្តស្ទឹងត្រែង បានបង្ហាញថា ទឹកទន្លេមេគង្គប្រកាសអាសន្ន ១០,៧០ម៉ែត្រ ព្រឹកម្សិល ៦,៧៤ម៉ែត្រ ព្រឹកនេះ មានកម្ពស់៧,៦៣ម៉ែត្រ ឡើង០,៨៩ម៉ែត្រ។ ទន្លេសេសានប្រកាសអាសន្ន ១០,៥០ម៉ែត្រ ព្រឹកម្សិល ៥,៩១ ម៉ែត្រ ព្រឹកនេះ ៦,៧៨ម៉ែត្រ ឡើង ០,៨៧ម៉ែត្រ និងទន្លេសេកុងប្រកាសអាសន្ន ១១,៥០ ម៉ែត្រ ព្រឹកម្សិល ៥,៧៨ ព្រឹកនេះ ៩,៥២ម៉ែត្រ ឡើង៣,៦២។ 

លោក ប៉ាង ប៉េង បានបញ្ជាក់ថា បន្ទាប់ពីមានភ្លៀងធ្លាក់ខ្លាំងជារៀងរាល់ថ្ងៃ ក្នុងខែកញ្ញានេះ ធ្វើឱ្យទឹកទន្លេទាំងបីក្នុងខេត្តស្ទឹងត្រែង មានការហក់ឡើងជាបន្តបន្ទាប់ និងគួរព្រួយឱ្យព្រួយបារម្ភ ទោះជាទឹកមិនទាន់ដល់កម្រិតប្រកាសអាសន្នក៏ដោយ។

ប្រធានមន្ទីរធនធានទឹករូបនេះអំពាវនាវ សូមបងប្អូនប្រជាពលរដ្ឋរស់នៅតាមដងទន្លេទាំងបីក្នុងខេត្តស្ទឹងត្រែង ត្រូវត្រៀមលក្ខណៈ លើកកម្ពស់ការប្រុងប្រយ័ត្នជាប់ជានិច្ច៕

អត្ថបទ៖ ងិន លីម