ពូទីន ធ្វើតេស្តសំណាករួចហើយ និងកំពុងធ្វើចត្តាឡីស័ក បន្ទាប់មនុស្សជាច្រើនដែលលោកជួបកើតកូវីដ

វិមានក្រឹមឡាំងបាននិយាយកាលពីថ្ងៃអង្គារថា ប្រធានាធិបតីរុស្ស៊ីលោក វ្ល៉ាឌីមៀ ពូទីន កំពុងធ្វើចត្តាឡីស័ក បន្ទាប់ពីមនុស្សជាច្រើននៅក្នុងរង្វង់ខាងក្នុងរបស់គាត់បានធ្វើតេស្តវិជ្ជមានជំងឺកូវីដ ១៩ ជាពិសេសបុគ្គលិកម្នាក់ដែលលោកបានធ្វើការយ៉ាងជិតស្និទ្ធកាលពីថ្ងៃចន្ទ ។

ទន្ទឹមនោះ អ្នកនាំពាក្យវិមានក្រឹមឡាំងលោក Dmitry Peskov បាននិយាយថា លោក ពូទីន បានធ្វើតេស្តអវិជ្ជមាន ហើយពេលនេះលោកមានសុខភាពល្អ ប៉ុន្តែដើម្បីសុវត្ថិភាពលោកត្រូវធ្វើចត្តាឡីស័ក ។

លោក Peskov បានប្រាប់អ្នកសារព័ត៌មាននៅក្នុងសន្និសីទតាមទូរស័ព្ទថា ដោយសារមនុស្សជាច្រើននៅក្នុងក្រុមរបស់លោក ពូទីន បានធ្លាក់ខ្លួនឈឺដោយសារជំងឺកូវីដ ១៩ លោកប្រធានាធិបតីត្រូវមានទទួលខុសត្រូវ ពោលមិនបង្កគ្រោះថ្នាក់ដល់សុខភាពមិត្តរួមការងាររបស់លោកឡើយ ។

ស្របពេលជាមួយគ្នានេះ អ្នកនាំពាក្យរូបនេះមិនបានបញ្ជាក់ថាអ្នកណាបានធ្វើតេស្តវិជ្ជមាននោះទេ ហើយបាននិយាយថា លោកមិនដឹងថាតើបុគ្គលទាំងនោះបានចាក់វ៉ាក់សាំងឬក៏អត់នោះទេ ។

ចំណែកលោក ពូទីន វិញបានចាក់វ៉ាក់សាំងការពារជំងឺកូវីដ ១៩ រួចហើយ ពោលលោកបានចាក់វ៉ាក់សាំងរុស្ស៊ីខ្លួនឯង Sputnik V ដូសទី ២ កាលពីខែមេសា ។

គួរបញ្ជាក់ថា គិតចាប់ពីថ្ងៃចន្ទមក លោក ពូទីន បានជួបចរចាផ្ទាល់ជាមួយប្រធានាធិបតីស៊ីរីលោក Bashar al-Assad ជួបជាមួយក្រុមប៉ារ៉ាឡាំពិករុស្ស៊ីមួយចំនួន និងបានចុះត្រួតពិនិត្យកងទ័ពដែលចូលរួមក្នុងសមយុទ្ធយោធានៅទីក្រុង Nizhny Novgorod ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ លោក ពូទីន ថា ត្រូវតែបញ្ចៀសលំហូរក្រុមឥស្លាមជ្រុលនិយមពីប្រទេសអាហ្វហ្គានីស្ថានចូលក្នុងតំបន់