តាលីបង់ អង្វរពិភពលោកកុំដាក់សម្ពាធលើ អាហ្វហ្គានីស្ថាន និងបន្តសុំជំនួយពីអន្តរជាតិ

រដ្ឋមន្ត្រីការបរទេសស្តីទីនៃរដ្ឋាភិបាលបណ្តោះអាសន្នអាហ្វហ្គានីស្ថានលោក Amir Khan Muttaqi បាននិយាយកាលពីថ្ងៃអង្គារថា អាហ្វហ្គានីស្ថានចង់មានទំនាក់ទំនងល្អជាមួយបណ្តាប្រទេសនៅជុំវិញពិភពលោក ហើយបានអំពាវនាវឲ្យបន្តផ្តល់ជំនួយពីអង្គការអន្តរជាតិដល់ប្រទេសនេះ ។

លោកបាននិយាយនៅក្នុងសន្និសីទសារព័ត៌មានមួយថា “យើងចង់មានទំនាក់ទំនងល្អជាមួយបណ្តាប្រទេសនៅលើពិភពលោក ប៉ុន្តែអង្វរឲ្យពួកគេកុំដាក់សម្ពាធលើអាហ្វហ្គានីស្ថាន ព្រោះសម្ពាធមិនអាចធ្វើការអ្វីឡើយ ហើយមិនផ្តល់ផលប្រយោជន៍ដល់អាហ្វហ្គានីស្ថាន ឬប្រទេសពិភពលោកនោះទេ” ។

ចំណែកពាក់ព័ន្ធបញ្ហានៃការទទួលស្គាល់ជាអន្តរជាតិ របស់រដ្ឋាភិបាលតាលីបង់ លោក Muttaqi បាននិយាយថា ពួកគេកំពុងទាក់ទងជាមួយតំណាងអង្គការសហប្រជាជាតិ និងប្រទេសនីមួយៗ ។

លោកបានបន្ថែមថា “វាត្រូវបានគេដឹងថា ប្រជាជនអាហ្វហ្គានីស្ថានមានភាពតានតឹងក្រោមសង្គ្រាមរយៈពេល ៤០ ឆ្នាំមកហើយ នោះហើយជាមូលហេតុដែលយើងសង្ឃឹមថា សហគមន៍អន្តរជាតិនឹងផ្តល់ជំនួយដល់អាហ្វហ្គានីស្ថានក្នុងវិស័យផ្សេងៗ” ។

បើយោងតាមធនាគារពិភពលោកបានឲ្យដឹងថា ជំនួយបរទេសមានចំនួន ៤៣ ភាគរយនៃសេដ្ឋកិច្ចអាហ្វហ្គានីស្ថាននៅឆ្នាំ ២០២០ ហើយប្រទេសនេះនៅតែស្ថិតក្នុងចំណោមប្រទេសក្រីក្របំផុតរបស់ពិភពលោក ខណៈមានផលិតផលក្នុងស្រុកសរុបសម្រាប់មនុស្សម្នាក់ត្រឹមតែ ៥០៩ ដុល្លារប៉ុណ្ណោះក្នុងមួយឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ តាលីបង់ គំរាមសម្លាប់កីឡាការិនីប្រដាល់ជម្រើសជាតិ អាហ្វហ្គានីស្ថាន ពេលឃើញហ្វឹកហាត់ជាមួយគ្រូប្រុស