សម្ដេចតេជោ ហ៊ុន សែន ៖ បញ្ហាដែលត្រូវដោះស្រាយ គឺកូវីដ និងសង្គមសេដ្ឋកិច្ច ហើយគ្មានការចរចានោះទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ជាថ្មីថា បញ្ហាដែលរាជរដ្ឋាភិបាលកម្ពុជា ត្រូវធ្វើ​នា​ពេលនេះ គឺដោះស្រាយបញ្ហាជំងឺកូវីដ-១៩ និងដោះស្រាយបញ្ហាសង្គមសេដ្ឋកិច្ច ហើយមិនមានការចរចាណា​មួយ​ ជាមួយនឹងក្រុមឧទ្ធាមក្រៅច្បាប់នោះទេ។

ការគូសបញ្ជាក់នេះ គ្រាដែលសម្ដេចតេជោ ហ៊ុន សែន បានអ​ញ្ជើញធ្វើសន្និសីទសារព័ត៌មាន បើកយុទ្ធនាការចាក់វ៉ាក់សាំងបង្ការជំងឺកូវីដ-១៩ សម្រាប់កុមារចាប់ពីអាយុ៦ឆ្នាំ ដល់អាយុក្រោម​១២ឆ្នាំ នៅព្រឹកថ្ងៃទី១៧ ខែកញ្ញា ឆ្នាំ២​០​​២១នេះ។

សម្ដេចតេជោនាយករដ្ឋមន្ត្រី បានបញ្ជាក់ថា បញ្ហាដែលកម្ពុជា ត្រូវដោះស្រាយនាពេលនេះ គឺបញ្ហានៃការរាត​ត្បាត​ជំងឺ​​កូវីដ-១៩ និងដោះស្រាយបញ្ហាសង្គមសេដ្ឋកិច្ច ដើម្បីឈានទៅដល់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ឆ្នាំ២០២២ និងការបោះឆ្នោតជ្រើសតាំង តំណាងរាស្រ្ដឆ្នាំ២០២៣ខាងមុខ។

សម្ដេចតេជោ ហ៊ុន​ សែន បានគូសបញ្ជាក់ជាថ្មីថា គ្មានការចរចាជាមួយពួកឧទ្ទាមក្រៅច្បាប់ និងក្រុមដែលល្មើស​ច្បាប់នោះទេ។ បញ្ហារបស់ក្រុមទាំងនោះ ត្រូវដោះស្រាយជាមួយតុលាការ៕

អត្ថបទ៖ ឃួន សុភ័ក្រ