ថៃ ចាប់ផ្តើមផ្តល់ដើមប្រមាត់មនុស្ស ដល់កសិករ សម្រាប់ដាំដុះ ដើម្បីផលិតថ្នាំព្យាបាលកូវីដ

កសិករនៅខេត្ត ឈៀងម៉ៃ បានទទួលដើមប្រមាត់មនុស្សចំនួន ១០ ម៉ឺនដើម ក្រោមគម្រោងរបស់រដ្ឋាភិបាលដើម្បីជំរុញការផលិតឱសថប្រឆាំងជំងឺកូវីដ-១៩។

ដើមទាំងនេះ នឹងត្រូវដាំដុះនៅស្រុកចំនួនបី នៃខេត្តភាគខាងជើងមួយនេះ ក្នុងគម្រោងសាកល្បងដែលឧបត្ថម្ភដោយ ក្រសួងកសិកម្មនិងសហករណ៍។

ទន្ទឹមនឹងនេះ ក្រសួងរំពឹងថា ដើមប្រមាត់មនុស្សចំនួន ១តោន នឹងប្រមូលផលបាននៅត្រឹមចុងខែកញ្ញានេះ ដែលអាចផលិតបានឪសថពី ២០០ ទៅ ៣០០ គីឡូក្រាម។

កាលពីថ្ងៃចន្ទ ដើមប្រមាត់មនុស្សចំនួន ១០ ម៉ឺនដើម ត្រូវបានចែកចាយទៅឲ្យភ្នាក់ងារឯកជននិងរដ្ឋាភិបាល សម្រាប់ដាំនៅក្នុងស្រុក Mae Rim, San Sai និង Mae Wang។ គម្រោងនេះ ក៏មានបំណងបង្កើនប្រាក់ចំណូលដល់ប្រជាជនក្នុងតំបន់ផងដែរ។ វិស័យឯកជន នឹងគាំទ្រដល់ការដាំដុះដើមនេះ តាំងពីដាំរហូតដល់ប្រមូលផល។

ដើមប្រមាត់មនុស្សដែលប្រមូលបាន នឹងត្រូវប្រគល់ទៅឲ្យភ្នាក់ងារសុខភាពសាធារណៈក្នុងស្រុក និងសហភាពសមាគមឱសថបុរាណថៃ ដែលនឹងកែច្នៃដើមនេះទៅជាឱសថ និងចែកចាយដល់អ្នកខេត្តឈៀងម៉ៃ៕

ប្រែសម្រួល៖ Vann Vann

ប្រភព៖ Nation

ចុចអាន៖ ថៃ ជំរុញឲ្យកសិករទូទាំងប្រទេស ដាំស្មៅប្រមាត់មនុស្ស បន្ទាប់ពីរកឃើញប្រសិទ្ធភាព ព្យាបាលកូវីដ