កម្ពុជាត្រៀមរៀបចំ និងនីតិវិធីប្រតិបត្តិស្តង់ដារ សម្រាប់អនុវត្តនៅផ្សារទំនើប និងផ្សារសាធារណៈទូទាំងប្រទេស

រដ្ឋមន្ត្រីក្រសួងសុខាភិបាល បានផ្ញើលិខិតជូន រដ្ឋមន្ត្រីក្រសួងទេសចរណ៍នៅថ្ងៃទី២២ ខែកញ្ញានេះ ស្ដីពី ការរៀបចំ និងនីតិវិធីប្រតិបត្តិស្តង់ដារ សម្រាប់ ដាក់ឱ្យអនុវត្ត នៅផ្សារទំនើប និងផ្សារ សាធារណៈទាំងអស់ នៅទូទាំងប្រទេស។

ក្នុងលិខិត លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានផ្ញើលិខិតជូន លោក ថោង ខុន រដ្ឋមន្ត្រីក្រសួងទេសចរណ៍ ថា ដោយពិនិត្យឃើញស្ថានភាពនៃការរាតត្បាតជំងឺកូវីដ-១៩ មានសភាពធូរស្រាល និងដើម្បីជំរុញនៃដំណើរនៃសេដ្ឋកិច្ច និងសង្គមជាតិទាំងមូលទៅតាមគន្លងប្រក្រតីភាពថ្មី សូមក្រសួងទេសចរណ៍ត្រៀមរៀបចំនីតិវិធីប្រតិបត្តិស្ដង់ដារសម្រាប់ដាក់ឱ្យអនុវត្តនៅផ្សារទំនើប និងផ្សារសាធារណៈទាំងអស់នៅទូទាំងប្រទេស។

លោក ម៉ម ប៊ុន ហេង បានបន្តទៀតថា នីតិវិធីប្រតិបត្តិស្ដង់ដារត្រូវផ្ដោតទៅលើទាំងវិធានសុខាភិបាល វិធានរដ្ឋបាល និងវិធានច្បាប់ ដើម្បីធានាបានទាំងផ្នែកសុខភាពសាធារណៈ ទាំងការងើបឡើងវិញនៃសេដ្ឋកិច្ចជាតិ។

គួរបញ្ជាក់ថា បន្ទាប់ពីស្ថានភាពធូរស្រាលនៃការឆ្លងជំងឺកូវីដ-១៩ ព្រមទាំងយុទ្ធនាការចាក់វ៉ាក់សាំងជូនប្រជាពលរដ្ឋ និងកុមារបានជិត១០០%នៃចំនួនគោលដៅ កម្ពុជាបានបើកដំណើរការសាកល្បងនូវគ្រឹះស្ថានសិក្សាសាធារណៈ និងឯកជន កាលពីសប្ដាហ៍មុន ព្រមទាំងត្រៀមបើកដំណើរការវិស័យទេសចរណ៍ និងទទួលភ្ញៀវទេសចរអន្តរជាតិផងដែរ ដែលឈរលើគោលការវិធានការសុខាភិបាល៕

អត្ថបទ៖ ច័ន្ទ វីរៈ