អាជ្ញាធរបន្ទាយមានជ័យ ចាប់ផ្តើមជម្លៀស ពលរដ្ឋរស់នៅតាមមាត់ស្ទឹង លិចទឹកច្រើនគ្រួសារ ទៅរកទីទួលសុវត្ថិភាព

ប្រជាពលរដ្ឋរងគ្រោះដោយលិចទឹកជំនន់ រស់នៅតាមដងស្ទឹងសិរីសោភ័ណ និងស្ទឹងមង្គលបូរី ក្នុងនោះ មានក្រុង ក្នុង សង្កាត់ព្រះពន្លា និងសង្កាត់ អូរអំបិល ឃុំបត់ត្រង់ ជាច្រើនគ្រួសារមករស់នៅទីទួលសុវត្តិភាព នៅល្ងាច ថ្ងៃទី ២២ ខែ កញ្ញា ឆ្នាំ ២០២១។

លោក ហុឹល រ៉ាយ៉ា អភិក្រុងសិរីសោភ័ណបានប្រាប់ អ្នកយកព័ត៍មានឲ្យដឹងថាដោយសារ៣ថ្ងៃនេះមានភ្លៀងធ្លាក់ជាប់ៗគ្នាព្រមទាំងថៃបើកបង្ហូរទឹកមកពីលើទៀតធ្វើឲ្យទឹកហក់ឡើងខ្លាំងមានផ្ទះប្រជាពលរដ្ឋលិចបណ្តើរៗអាជ្ញាធរក្រុងសិរីសោភ័ណបានជម្លៀស ប្រជាពលរដ្ឋលិចនោះមករស់នៅទីទួសសុវត្តិភាពហើយ។

លោក​ រ័ត្ន ដា​ស៊ី​ណង់ បានប្រាប់អ្នកយកព័ត៍មានឲ្យដឹងថា បងប្អូន​ដែលរស់នៅ​តាមបណ្តោយ​ដងស្ទឹង​មង្គល​បូរី​បានលិចជាបណ្តើរៗហើយក្នុងនេះលោកបានជម្លៀស ប្រជាពលរដ្ឋ​ ដឹកជញ្ជូន​ទូក កាណូត មករស់នៅទីទួល​សុវត្ថិភាពកន្លែងផ្លូវវាងក្រុងជាបណ្តើរផងដែរ។

លោក អ៊ុំ រាត្រី អភិបាលខេត្តបន្ទាយមានជ័យ និងក្រុមការងារបានចុះពិនិត្យពិស្ថានភាពទឹកបានប្រាប់ឲ្យដឹងថា ក្រោយពីមានភ្លៀងធំធ្លាក់មកជាប់ៗគ្នា៣ថ្ងៃស្រាប់តែទឹកស្ទឹងសិរីសោភ័ណហក់ឡើងយ៉ាងខ្លាំងនៅខ្វះតែ កន្លះម៉ែត្រទឹកអាចឡើងដល់ឆ្នាំមុនហើយ។

តែតំបន់វាលទំនាប ភូមិ តាមមាត់អូរ ស្ទឹងលិចតែ មិនទាន់ប៉ះពាល់ដល់អាយុជីវិតសត្វនិងហេដ្ឋារចនាសម្ព័ន្ធនោះឡើយ។

ពលរដ្ឋដែលរងគ្រោះដោយទឹកជំនន់ទាំងអស់ខាងលើនោះត្រូវបានរដ្ឋបាលខេត្ត ក្រុង ស្រុកបានជម្លៀសទៅទីទួលសុវត្ថិភាពអស់ហើយថែមទាំងបានចែកស្បៀងឲ្យទុកបរិភោគទៀតផង៕

អត្ថបទៈ វ៉ាន់ ណាង